వెస్టిండీస్‌పై భారత్‌ విజయం

ఈస్ట్‌ లండన్‌: మహిళల టీ20 ముక్కోణపు సిరీస్‌లో సోమవారం నామమాత్రపు మ్యాచ్‌లో భారత్‌ 8 వికెట్ల తేడాతో వెస్టిండీస్‌పై విజయం సాధించింది. దీప్తి శర్మ (3/11) అద్భుతంగా బౌలింగ్‌ చేయడంతో మొదట విండీస్‌ 6 వికెట్లకు 94 పరుగులే చేయగలిగింది. హేలీ మాథ్యూస్‌ (34; 34 బంతుల్లో 5×4) టాప్‌ స్కోరర్‌. పూజ వస్త్రాకర్‌ (2/19), రాజేశ్వరి గైక్వాడ్‌ (1/9) కూడా బంతితో రాణించారు. జెమీమా (42 నాటౌట్‌; 39 బంతుల్లో 5×4), హర్మన్‌ప్రీత్‌ (32 నాటౌట్‌; 23 బంతుల్లో 4×4) చెలరేగడంతో లక్ష్యాన్ని భారత్‌ 13.5 ఓవర్లలో రెండే వికెట్లు కోల్పోయి అలవోకగా ఛేదించింది. దీప్తి శర్మకు ‘ప్లేయర్‌ ఆఫ్‌ ద మ్యాచ్‌’ అవార్డు లభించింది. భారత జట్టు ఫిబ్రవరి 2న జరిగే ఫైనల్లో దక్షిణాఫ్రికాను ఢీకొంటుంది.

అండర్‌-19 విజయం స్ఫూర్తితో..: మహిళల అండర్‌-19 ప్రపంచకప్‌ విజయం స్ఫూర్తితో ఫిబ్రవరి 10న ఆరంభమయ్యే టీ20 ప్రపంచకప్‌ బరిలో దిగుతున్నామని భారత మహిళ క్రికెట్‌ కెప్టెన్‌ హర్మన్‌ప్రీత్‌ కౌర్‌ చెప్పింది. ‘‘దక్షిణాఫ్రికాలో జరిగే టీ20 ప్రపంచకప్‌కు ముందు అండర్‌-19 జట్టు విజయం స్ఫూర్తినిచ్చింది. ఏ స్థాయిలో అయినా ప్రపంచకప్‌ నెగ్గడం పెద్ద విజయం. అందులోనూ తొలి టోర్నీలోనే టైటిల్‌ సాధించడం ఎప్పటికి గుర్తుండిపోతుంది. భారత జట్టుకు అభినందనలు. టీ20 ప్రపంచకప్‌లో పోటీపడే భారత జట్టులో సీనియర్లతో పాటు తాజాగా అండర్‌-19 ప్రపంచకప్‌ గెలిచిన షెఫాలీవర్మ, రిచాఘోష్‌ లాంటి యువ తారలు ఉన్నారు. జట్టు సమతూకంగా ఉంది’’ అని హర్మన్‌ప్రీత్‌ తెలిపింది.