నాణ్యమైన సన్నద్ధత ఇవ్వకపోతే ఎలా?

మెల్‌బోర్న్‌: తమ దేశంలో పర్యటించే జట్లకు నాణ్యమైన సన్నద్ధత ఇవ్వడానికి భారత్‌ ఇష్టపడదని, ఇది తనకు నచ్చని విషయమని ఆస్ట్రేలియా మాజీ వికెట్‌కీపర్‌ ఇయాన్‌ హీలీ చెప్పాడు. టూర్‌ మ్యాచ్‌ల్లో పచ్చిక పిచ్‌లపై ఆడిస్తారని, అసలు మ్యాచ్‌ల్లో స్పిన్‌ పిచ్‌లు ఎదురవుతాయని తాజాగా ఆసీస్‌ బ్యాటర్‌ ఉస్మాన్‌ ఖవాజా చేసిన వ్యాఖ్యలు నిజమే అని హీలీ అన్నాడు. ‘‘తమ దేశంలో పర్యటించే జట్లకు నాణ్యమైన సన్నద్ధత కల్పించడానికి భారత్‌ ఇష్టపడదు. అందుకే ఈ విషయంలో వాళ్లపై విశ్వాసం లేదు. ఇలాంటి చర్యలు రెండు దేశాల మధ్య బంధాన్ని దెబ్బ తీస్తాయి. భారత్‌ పర్యటన కోసం అందుబాటులో ఉన్న స్పిన్నర్లను సిడ్నీలో జరుగుతున్న జాతీయ శిబిరానికి రప్పించాం. నెట్‌ ప్రాక్టీస్‌తో జట్టు తాజాగా కనబడుతోంది. భారత్‌లో విజయవంతం అవుతామని ఆసీస్‌ నమ్మకంతో ఉంది. రెండు, మూడు టెస్టుల మధ్య ఒక మూడు రోజుల మ్యాచ్‌ ఉంటే బాగుంటుందని భావిస్తున్నా’’ అని హీలీ పేర్కొన్నాడు.