భార్యపై దాడి.. కాంబ్లిపై కేసు

ముంబయి: టీమ్‌ఇండియా మాజీ ఆటగాడు వినోద్‌ కాంబ్లి మరోసారి చిక్కుల్లో పడ్డాడు. మద్యం మత్తులో భార్యపై దాడి చేసి గాయపరిచిన నేరారోపణపై కాంబ్లిపై ముంబయి పోలీసులు ఎఫ్‌ఐఆర్‌ నమోదు చేశారు. బాంద్రా శివారులోని కాంబ్లి ఇంట్లో ఈ ఘటన చోటుచేసుకున్నట్లు ఆదివారం పోలీసు అధికారి తెలిపాడు. శుక్రవారం జరిగిన ఈ ఘటనకు సంబంధించి ఇప్పటి వరకు ఎవరినీ అరెస్టు చేయలేదని అతడు చెప్పాడు. కాంబ్లి పెనం పిడిని తనపైకి విసరడంతో తలకు గాయమైనట్లు అతని భార్య ఆండ్రియా ఫిర్యాదులో పేర్కొంది. శుక్రవారం రాత్రి ఈ ఘటన జరిగిందని ఆ సమయంలో కాంబ్లి మద్యం మత్తులో ఉన్నాడని చెప్పింది. తమ 12 ఏళ్ల కుమారుడు గొడవను ఆపేందుకు ప్రయత్నించినా కాంబ్లి తనను గాయపరిచాడని ఫిర్యాదు చేసింది. పోలీసులకు ఫిర్యాదు చేసిన అనంతరం ఆమె వైద్య పరీక్షల కోసం ఆసుపత్రికి వెళ్లింది.