బ్యాటర్లు విఫలం

ఆస్ట్రేలియాతో వార్మప్‌లో భారత్‌ ఓటమి

కేప్‌టౌన్‌: మహిళల టీ20 ప్రపంచకప్‌ తొలి వార్మప్‌ మ్యాచ్‌లో భారత్‌ ఓటమి పాలైంది. బౌలర్లు రాణించినా.. బ్యాటర్లు విఫలం కావడంతో 44 పరుగుల తేడాతో డిఫెండింగ్‌ ఛాంపియన్‌ ఆస్ట్రేలియా చేతిలో ఓడించింది. సోమవారం మొదట బ్యాటింగ్‌ చేసిన ఆసీస్‌ను 20 ఓవర్లలో 129/8కే టీమ్‌ఇండియా కట్టడి చేసింది. శిఖ (2/9), పూజ (2/16), రాధ (2/22) విజృంభించారు. ఛేదనలో భారత్‌ పేలవ ప్రదర్శన చేసింది. 16 ఓవర్లలో 85 పరుగులకే కుప్పకూలింది. డార్సీ బ్రౌన్‌ (4/17) ధాటికి టాప్‌ఆర్డర్‌ పెవిలియన్‌కు క్యూ కట్టింది. 22కే 4 వికెట్లు కోల్పోయి భారత జట్టు ఓటమికి బాటలు వేసుకుంది. జెమీమా, స్మృతి మంధాన డకౌట్‌ కాగా.. షెఫాలీ (2), రిచా ఘోష్‌ (5) విఫలమయ్యారు. ఆ తర్వాత ఎవరూ నిలవలేదు. దీప్తిశర్మ (19 నాటౌట్‌), హర్లీన్‌ డియోల్‌ (12), అంజలి శర్వాణి (11) మాత్రమే రెండంకెల స్కోరు అందుకున్నారు. అష్లె గార్డెనర్‌ (2/16) కూడా టీమ్‌ఇండియా పతనంలో కీలకపాత్ర పోషించింది.