ఈ- రేసుకు ఇదే మంచి సమయం

దిల్లీ: భారత్‌లో అడుగుపెట్టేందుకు ఫార్ములా- ఈకి ఇది మంచి సమయమని భారత మాజీ ఎఫ్‌1 రేసర్‌ కరుణ్‌ చందోక్‌ అభిప్రాయపడ్డాడు. శనివారం దేశంలోనే తొలిసారిగా హైదరాబాద్‌లో ఫార్ములా- ఈ రేసు జరగనుంది. 2014 ఫార్ములా- ఈ ఆరంభ సీజన్‌లో మహీంద్రా తరపున కరుణ్‌ రేసులో పాల్గొన్నాడు. ఎఫ్‌1లో ప్రాతినిథ్యం వహించిన ఇద్దరు భారత రేసర్లలో అతనొకడు. ‘‘హైదరాబాద్‌లో తొలి ఈ- ప్రి రేసుతో ఈ వారమే ఫార్ములా- ఈ ప్రపంచ ఛాంపియన్‌షిప్‌ మొదటిసారి భారత్‌లో అడుగుపెడుతుంది. స్వదేశంలో ఈ ఛాంపియన్‌షిప్‌ కోసం ఆసక్తితో ఉన్నా. విద్యుత్‌ కార్లతో సాగే ఫార్ములా- ఈ ఛాంపియన్‌షిప్‌ భారత్‌కు రావడానికి ఇదే మంచి సమయం. మహీంద్రా, టాటా (జాగ్వర్‌) ఇందులో భాగంగా ఉన్నాయి. శాశ్వత ట్రాక్‌లపై కాకుండా నగరాల్లోని స్ట్రీట్‌ సర్క్యూట్‌లపై ఈ రేసులు ఎక్కువగా జరుగుతుండడం విశేషం.  హైదరాబాద్‌లో ఆసక్తి రేపుతోన్న ట్రాక్‌పై పోటీపడడాన్ని రేసర్లు ఆస్వాదిస్తారనుకుంటున్నా. హుస్సేన్‌సాగర్‌ పరిసరాల్లో ఈ ట్రాక్‌ ఏర్పాటుతో తెలంగాణ ప్రభుత్వం మంచి పని చేసింది’’ అని కరుణ్‌ పేర్కొన్నాడు.