వ్రితికి మరో పతకం

భోపాల్‌: ఖేలో ఇండియా యూత్‌ క్రీడల్లో తెలంగాణ స్విమ్మర్‌ వ్రితి అగర్వాల్‌ మరో పతకాన్ని ఖాతాలో వేసుకుంది. ఇప్పటికే 800 మీటర్ల ఫ్రీస్టైల్‌లో పసిడి నెగ్గిన ఆమె.. బుధవారం 400మీ. ఫ్రీస్టైల్‌లో రజతం సొంతం చేసుకుంది. 4 నిమిషాల 39.28 సెకన్లలో లక్ష్యాన్ని చేరుకుని రెండో స్థానంలో నిలిచింది. కర్ణాటక అమ్మాయిలు హషిక (4:37.84ని) స్వర్ణం, అష్మిత (4:41.36ని) కాంస్యం నెగ్గారు. పురుషుల 400మీ. వ్యక్తిగత మెడ్లీలో సాయి నిహార్‌ (4:43.81ని) కాంస్యం కైవసం చేసుకున్నాడు. యుగ్‌ (రాజస్థాన్‌- 4:38.12ని), శుభోజిత్‌ (బెంగాల్‌- 4:40.69ని) వరుసగా స్వర్ణ, రజత పతకాలు గెలిచారు. రోయింగ్‌ క్వాడ్రపుల్‌ స్కల్‌ విభాగంలో తెలంగాణకు కాంస్యం దక్కింది. శ్రావణ్‌ కుమార్‌, సాయి వరుణ్‌, గణేశ్‌, జ్ఞానేశ్వర్‌తో కూడిన జట్టు 3 నిమిషాల 31.28 సెకన్లలో రేసు ముగించి మూడో స్థానంలో నిలిచింది. మధ్యప్రదేశ్‌ (3:17.39ని), ఒడిషా (3:17.90ని) వరుసగా స్వర్ణ, రజత పతకాలు గెలిచాయి.