కర్ణాటకను ఆదుకున్న మయాంక్‌

సౌరాష్ట్రతో రంజీ సెమీస్‌

బెంగళూరు: సౌరాష్ట్రతో రంజీ సెమీస్‌లో కర్ణాటకను కెప్టెన్‌ మయాంక్‌ అగర్వాల్‌ (110 బ్యాటింగ్‌; 246 బంతుల్లో 11×4, 1×6) అజేయ శతకంతో ఆదుకున్నాడు. బుధవారం ఆరంభమైన ఈ మ్యాచ్‌ తొలి ఇన్నింగ్స్‌లో తడబడిన కర్ణాటక మొదటి రోజును 229/5తో ముగించింది. 112కే సగం వికెట్లు కోల్పోయి కష్టాల్లో పడ్డ జట్టును శ్రీనివాస్‌ శరత్‌ (58 బ్యాటింగ్‌; 143 బంతుల్లో 4×4)తో కలిసి మయాంక్‌ రక్షించాడు. మరో వికెట్‌ పడకుండా ఈ జోడీ ఆచితూచి బ్యాటింగ్‌ కొనసాగించింది. ఈ జంట అబేధ్యమైన ఆరో వికెట్‌కు 117 పరుగుల భాగస్వామ్యం నెలకొల్పింది. సౌరాష్ట్ర బౌలర్లలో కుశాంగ్‌ (2/64) రాణించాడు. మరోవైపు డిఫెండింగ్‌ ఛాంపియన్‌ మధ్యప్రదేశ్‌తో మరో సెమీస్‌లో బెంగాల్‌కు అదిరే ఆరంభం లభించింది. ఇండోర్‌లో జరుగుతున్న ఈ మ్యాచ్‌లో సుదీప్‌ కుమార్‌ (112; 213 బంతుల్లో 12×4, 2×6), అనుత్సుప్‌ మజుందార్‌ (120; 206 బంతుల్లో 13×4, 1×6) శతకాలు బాదడంతో తొలి ఇన్నింగ్స్‌లో బెంగాల్‌ భారీ స్కోరుకు బాటలు వేసుకుంది. వీళ్ల శతకాల సాయంతో తొలి రోజు ఆటను 307/4తో ముగించింది. సుదీప్‌, అనుత్సుప్‌ మూడో వికెట్‌కు 241 పరుగులు జోడించారు. ఆఖర్లో కొత్త బంతితో ఈ ఇద్దరినీ ఔట్‌ చేయడం మధ్యప్రదేశ్‌కు ఊరటనిచ్చే విషయం. కెప్టెన్‌ మనోజ్‌ తివారి (5 బ్యాటింగ్‌), షాబాజ్‌ అహ్మద్‌ (6 బ్యాటింగ్‌) క్రీజులో ఉన్నారు.