ప్రపంచ ఛాంపియన్‌ వైట్‌వాష్‌.. ఆఖరి టీ20లోనూ బంగ్లా చేతిలో ఇంగ్లాండ్‌ ఓటమి

మిర్పూర్‌: టీ20 ప్రపంచ ఛాంపియన్‌ ఇంగ్లాండ్‌కు చేదు అనుభవం! బంగ్లాదేశ్‌తో మూడు టీ20ల సిరీస్‌ను ఆ జట్టు 0-3తో కోల్పోయింది. స్ఫూర్తిదాయక ప్రదర్శన చేసిన బంగ్లా.. మంగళవారం సిరీస్‌లో ఆఖరిదైన మూడో టీ20లో 16 పరుగుల తేడాతో ఇంగ్లిష్‌ జట్టును ఓడించి వైట్‌వాష్‌ చేసింది. మొదట బంగ్లా 158/2 స్కోరు చేసింది. లిటన్‌దాస్‌ (73; 57 బంతుల్లో 10×4, 1×6) సత్తా చాటాడు. నజ్ముల్‌ శాంటో (47; 36 బంతుల్లో 1×4, 2×6) కూడా రాణించాడు. ఛేదనలో తొలి ఓవర్లోనే సాల్ట్‌ (0) వికెట్‌ కోల్పోయిన ఇంగ్లాండ్‌ను డేవిడ్‌ మలన్‌ (53; 47 బంతుల్లో 6×4, 2×6), కెప్టెన్‌ బట్లర్‌ (40; 31 బంతుల్లో 4×4, 1×6) ఆదుకున్నారు. ఒక దశలో ఆ జట్టు 13 ఓవర్లలో 100/1తో విజయం దిశగా సాగింది. కానీ మలన్‌, బట్లర్‌ ఒకే ఓవర్లో ఔట్‌ కావడంతో ఇంగ్లాండ్‌కు ఎదురుదెబ్బ తగిలింది. బంగ్లా బౌలర్లు కట్టుదిట్టంగా బౌలింగ్‌ చేయడంతో ఇంగ్లిష్‌ బ్యాటర్లు స్వేచ్ఛగా ఆడలేకపోయారు. 3 ఓవర్లకు 36 పరుగులు సాధించాల్సిన పరిస్థితిలో ఇంగ్లాండ్‌ 19 పరుగులే చేసి ఓడిపోయింది. ఆ జట్టు నిర్ణీత ఓవర్లలో 142/6 స్కోరే చేయగలిగింది. ఒక పెద్ద జట్టును టీ20ల్లో వైట్‌వాష్‌ చేయడం బంగ్లాకు ఇదే తొలిసారి. ఈ ఫార్మాట్లో వైట్‌వాష్‌కు గురి కావడం ఇంగ్లాండ్‌కు ఇది మూడోసారి. ఇంతకుముందు ఆస్ట్రేలియా (2014), దక్షిణాఫ్రికా (2016)పై ఇలాగే ఓడింది.