సత్య నాదెళ్లతో చేతులు కలిపిన దిల్లీ క్యాపిటల్స్‌

అమెరికాలో టీ20 లీగ్‌

దిల్లీ: అమెరికా టీ20 టోర్నీ మేజర్‌ లీగ్‌ క్రికెట్‌ (ఎంఎల్‌సీ)లో సియాటల్‌ ఫ్రాంచైజీ నిర్వహణ కోసం మైక్రోసాఫ్ట్‌ సీఈఓ సత్య నాదెళ్లతో దిల్లీ క్యాపిటల్స్‌ చేతులు కలిపింది. ఈ జట్టుకు సియాటల్‌ ఆర్కాస్‌ అని పేరుపెట్టారు. సియాటల్‌ పరిసర సముద్రంలో కనిపించే ప్రమాదకర తిమింగళం పేరు ఆర్కాస్‌. ఇక జులైలో ఈ లీగ్‌ ప్రారంభంకానుంది. ముంబయి ఇండియన్స్‌, చెన్నై సూపర్‌ కింగ్స్‌ కూడా కొత్త లీగ్‌తో కలిసి పని చేస్తున్నాయి. జట్టును నిర్మించడం.. నిర్వహించడంలో సియాటల్‌ ఆర్కాస్‌లో జీఎంఆర్‌ గ్రూపు భాగస్వామిగా ఉంటుందని ఎంఎల్‌సీ ప్రకటించింది. సియాటల్‌ గ్రూపులో సత్యతో పాటు పలువురు ప్రముఖులు పెట్టుబడి పెట్టారు.