మళ్లీ సెమీస్‌లోనే

ఆల్‌ ఇంగ్లాండ్‌లో గాయత్రి జోడీ ఓటమి

ఆల్‌ ఇంగ్లాండ్‌ ఛాంపియన్‌షిప్‌ బ్యాడ్మింటన్‌ టోర్నీలో గాయత్రి గోపీచంద్‌- ట్రీసా జాలీ అద్భుత పోరాటం ముగిసింది. వరుసగా రెండో ఏడాదీ ఈ జంట సెమీస్‌లోనే నిష్క్రమించింది. శనివారం మహిళల డబుల్స్‌ సెమీస్‌లో గాయత్రి- ట్రీసా ద్వయం 10-21, 10-21 తేడాతో ప్రపంచ 20వ ర్యాంకర్‌ బేక్‌- లీ సో (కొరియా) జంట చేతిలో ఓటమి పాలైంది. సహచర భారత షట్లర్లు ఒక్కొక్కరిగా నిష్క్రమించినా పోరాటాన్నే నమ్ముకుని సెమీస్‌ వరకూ వచ్చిన ప్రపంచ 17వ ర్యాంకర్‌ గాయత్రి జోడీ ఈ కీలక పోరులో ఒత్తిడికి తలవంచింది. నిరుడు లీ- షిన్‌ జంట గాయత్రి ద్వయం చేతిలో ఓడింది. కానీ ఈ సారి బేక్‌తో జతకట్టిన లీ.. భారత షట్లర్లపై తగిన ప్రతీకారం తీర్చుకుంది. డిఫెన్స్‌లో బలంగా నిలబడ్డ కొరియా జంట.. సుదీర్ఘమైన ర్యాలీలతో గాయత్రి- ట్రీసాను పరీక్షించింది. ప్రత్యర్థి ఆటను సరైన విధంగా ఎదుర్కోలేకపోయిన గాయత్రి జంట పదేపదే తప్పిదాలు చేసి తొలి గేమ్‌లో 5-11తో వెనుకబడింది. విరామం తర్వాత 9-13తో ప్రత్యర్థిని సమీపించి కాస్త పుంజుకున్నట్లే కనిపించింది. కానీ 10-14తో నిలిచిన భారత షట్లర్లు ఆ తర్వాత ఒక్క పాయింట్‌ కూడా గెలవలేకపోయారు. ప్రత్యర్థి జోడీ వరుసగా ఏడు పాయింట్లు నెగ్గి గేమ్‌ ముగించింది. రెండో గేమ్‌లో భారత షట్లర్లకు నెట్‌ దగ్గర ఆడే అవకాశం ఇవ్వని కొరియా ద్వయం.. దూకుడు కొనసాగించి గెలుపును సొంతం చేసుకుంది.