సత్తా మేరకు ఆడలేదు: రోహిత్‌

విశాఖపట్నం: ఆస్ట్రేలియా పేసర్‌ స్టార్క్‌ బలానికి పడిపోయామని టీమ్‌ఇండియా కెప్టెన్‌ రోహిత్‌ శర్మ అన్నాడు. ‘‘స్టార్క్‌ నాణ్యమైన బౌలర్‌. కొత్త బంతితో కొన్నేళ్లుగా ఆస్ట్రేలియాకు వికెట్లు అందిస్తున్నాడు. తన బలాన్ని ఉపయోగించి బంతులేశాడు. మేం అతని బలానికి పడిపోయాం. అది అర్థం చేసుకుని, అందుకు తగినట్లు ఆడడంపై దృష్టి పెట్టాలి. బ్యాటింగ్‌ ప్రదర్శన పూర్తిగా నిరాశపర్చింది. మా సత్తామేరకు ఆడలేకపోయాం. ఆ పరుగులు సరిపోవని తెలుసు. ఇది 117 పరుగులు చేసే పిచ్‌ ఏ మాత్రం కాదు. మేం మా ఆటతీరు ప్రదర్శించలేకపోయాం. శ్రేయస్‌ కోలుకుని ఎప్పుడు జట్టులోకి వస్తాడో తెలీదు. ఆ స్థానంలో సూర్యను ఆడిస్తున్నాం. అతని సామర్థ్యం అందరికీ తెలిసిందే. అలాంటి ఆటగాడికి అవకాశాలివ్వాలి. వన్డేల్లోనూ రాణించాలని సూర్యకు తెలుసు. ఆస్ట్రేలియాతో రెండు మ్యాచ్‌ల్లో, అంతకంటే ముందు వన్డేల్లో అతను ఆకట్టుకోలేకపోయాడు. కానీ అతనికి మ్యాచ్‌లాడే అవకాశమిస్తాం. ఒకవేళ అప్పటికీ కుదురుకోకపోతే ఆలోచిస్తాం. బుమ్రా లేకుండా ఆడడం జట్టుకు అలవాటవుతోంది. అతని స్థానాన్ని భర్తీ చేయడం కష్టమే’’ అని రోహిత్‌ చెప్పాడు.