ఫాలోఆన్‌లో లంక

ప్రస్తుతం 113/2

వెల్లింగ్టన్‌: శ్రీలంకతో తొలి టెస్టులో గెలిచి రెండు మ్యాచ్‌ల సిరీస్‌లో ఆధిక్యంలో ఉన్న న్యూజిలాండ్‌.. క్లీన్‌స్వీప్‌ దిశగా సాగుతోంది. రెండో టెస్టులోనూ ఆ జట్టు పట్టు బిగించింది. తొలి ఇన్నింగ్స్‌లో లంకను 164కే కుప్పకూల్చిన కివీస్‌.. ప్రత్యర్థిని ఫాలోఆన్‌ ఆడిస్తోంది. మూడో రోజు ఆట చివరికి లంక రెండో ఇన్నింగ్స్‌లో 113/2తో నిలిచింది. కుశాల్‌ మెండిస్‌ (50), ఏంజెలో మాథ్యూస్‌ (1) క్రీజులో ఉన్నారు. దిముత్‌ కరుణరత్నే (51) అర్ధసెంచరీ చేసి ఔటయ్యాడు. ఇంకా ఆ జట్టు 303 పరుగులు వెనకబడి ఉంది. అంతకుముందు ఓవర్‌నైట్‌ స్కోరు 26/2తో తొలి ఇన్నింగ్స్‌ కొనసాగించిన లంక.. ఒక దశలో 114/4తో మెరుగ్గానే కనిపించింది. కానీ మాట్‌ హెన్రీ (3/44), మైకేల్‌ బ్రాస్‌వెల్‌ (3/50) ధాటికి 50 పరుగుల తేడాతో 6 వికెట్లు కోల్పోయి రెండొందల్లోపే ఆలౌటైంది. దిముత్‌ (89; 188 బంతుల్లో 9×4), చండిమాల్‌ (37; 92 బంతుల్లో 4×4) పోరాడకపోతే ఆ జట్టు ఆ మాత్రం స్కోరు కూడా చేసేదే కాదు. తొలి ఇన్నింగ్స్‌ను న్యూజిలాండ్‌ 580/4 వద్ద డిక్లేర్‌ చేసిన సంగతి తెలిసిందే.