ఆ సమాధానమే అర్థం కాలేదు.. వెస్టిండీస్‌ బ్యాటర్‌ డెండ్రా డాటిన్‌

దిల్లీ: తనను జట్టులోంచి ఎందుకు తీసేశారని అడిగినందుకు మహిళల ప్రిమియర్‌ లీగ్‌ (డబ్ల్యూపీఎల్‌) ఫ్రాంఛైజీ గుజరాత్‌ జెయింట్స్‌ చిత్రమైన సమాధానం చెప్పిందని వెస్టిండీస్‌ బ్యాటర్‌ డెండ్రా డాటిన్‌ తెలిపింది. వేలంలో రూ.60 లక్షలు పెట్టి డాటిన్‌ను దక్కించుకున్న గుజరాత్‌.. వైద్య కారణాల పేరిట టోర్నీ ఆరంభంలో జట్టు నుంచి ఆమెను తప్పించింది. ఈ పరిణామంపై సామాజిక మాధ్యమంలో విండీస్‌ బ్యాటర్‌ అసంతృప్తి వ్యక్తం చేసింది. ‘‘డబ్ల్యూపీఎల్‌ ఆరంభానికి ముందు జెయింట్స్‌ నన్ను తీసేయడం చాలా నిరాశ కలిగించింది. ఎందుకు తప్పించారంటే వాళ్లు చెప్పిన కారణం.. అనారోగ్యం నుంచి కోలుకుంటున్నానట. ఇదే అర్థం కాలేదు. పొత్తి కడుపులో నొప్పితో కొంచెం ఇబ్బందిపడ్డాను. జనవరిలో నిపుణులను సంప్రదించా. ఫిబ్రవరి 13 వరకు విశ్రాంతి తీసుకోవాలని వైద్యులు సూచించారు. ఫిబ్రవరి 14 నుంచి క్రికెట్‌ ఆడొచ్చని లిఖిత పూర్వకంగా ధ్రువీకరించారు. ఆ తర్వాత శిక్షణ కొనసాగించా. శిక్షణలో కాస్త నొప్పిగా అనిపించడంతో కొన్ని రోజులు విశ్రాంతి కావాలని ఫ్రాంఛైజీకి చెప్పా. కానీ నా మాటలను ఇంకోలా అర్థం చేసుకున్నారు. మ్యాచ్‌ ఆడేందుకు ఫిట్‌గా ఉన్నట్లు ఫిబ్రవరి 20న ధ్రువీకరణ పత్రం వచ్చింది. దీన్ని గుజరాత్‌ జట్టుకు కూడా పంపా. కానీ అప్పటికే జరగాల్సింది జరిగిపోయింది’’ అని డాటిన్‌ వివరించింది.