తెలంగాణకు కాంస్యం

జమ్ము: అంతర్‌ రాష్ట్ర సీనియర్‌ జాతీయ టేబుల్‌ టెన్నిస్‌ ఛాంపియన్‌షిప్స్‌లో తెలంగాణ పురుషుల జట్టు మెరిసింది. 2020లో చారిత్రక ప్రదర్శనను ఇప్పుడు పునరావృతం చేసి.. మరోసారి కాంస్య పతకం ముద్దాడింది. సెమీస్‌లో తెలంగాణ 2-3 తేడాతో రైల్వే స్పోర్ట్స్‌ ప్రమోషన్‌ బోర్డ్‌ (ఆర్‌ఎస్‌పీబీ) చేతిలో పోరాడి ఓడింది. తొలి సింగిల్స్‌లో మహమ్మద్‌ అలీ 5-11, 11-6, 4-11, 7-11తో రోనిత్‌ చేతిలో ఓడడంతో తెలంగాణ 0-1తో పోరును మొదలెట్టింది. రెండో సింగిల్స్‌లో స్నేహిత్‌ 11-9, 11-5, 10-12, 7-11, 11-5తో అనిర్బన్‌పై గెలిచి 1-1తో స్కోరు సమం చేశాడు. కానీ మూడో మ్యాచ్‌లో వాన్ష్‌ సింగాల్‌ ఓడిపోవడంతో తెలంగాణ 1-2తో వెనుకబడింది. ఆ దశలో స్నేహిత్‌ 11-9, 11-3, 11-8తో రోనిత్‌పై గెలిచి మరోసారి 2-2తో జట్టు ఆశలు నిలిపాడు. కానీ చివరి సింగిల్స్‌లో మహమ్మద్‌ అలీ 5-11, 9-11, 9-11తో అనిర్బన్‌ చేతిలో ఓడడంతో తెలంగాణకు పరాజయం తప్పలేదు. ఫైనల్లో పీఎస్‌పీబీ 3-1తో ఆర్‌ఎస్‌పీబీని ఓడించి టైటిల్‌ దక్కించుకుంది. మహిళల జట్టు విభాగంలో ఆకుల శ్రీజ సభ్యురాలిగా ఉన్న ఆర్‌బీఐ 3-2తో తమిళనాడుపై నెగ్గి తొలిసారి ఈ ట్రోఫీ కైవసం చేసుకుంది.