ఫైనల్లో సాత్విక్‌ జోడీ

బాసెల్‌: స్విస్‌ ఓపెన్‌ సూపర్‌ సిరీస్‌ 300 బ్యాడ్మింటన్‌ టోర్నీలో సాత్విక్‌ సాయిరాజు, చిరాగ్‌ శెట్టి ద్వయం ఫైనల్‌కు దూసుకెళ్లింది. శనివారం హోరాహోరీగా సాగిన సెమీఫైనల్లో భారత స్టార్‌ జోడీ 21-19, 17-21, 21-17తో మూడో సీడ్‌ ఆంగ్‌ యివ్‌ సిన్‌, టియో ఈ యి (మలేసియా) జోడీపై విజయం సాధించింది. 69 నిమిషాల్లో ముగిసిన ఈ మ్యాచ్‌ తొలి గేమ్‌లో రెండో సీడ్‌ సాత్విక్‌ జోడీ దూకుడు ప్రదర్శించింది. 11-9తో విరామానికి వెళ్లింది. ఆ తర్వాత జోరు కొనసాగించి 16-11తో ఆధిపత్యం చెలాయించింది. ప్రత్యర్థి షట్లర్లు పుంజుకోవడంతో సాత్విక్‌ ద్వయం 17-19తో వెనకబడింది. అయితే కీలక సమయంలో వరుసగా 4 పాయింట్లు సాధించి తొలి గేమ్‌ను గెలుచుకుంది భారత జోడీ. రెండో గేమ్‌లో తడబడిన సాత్విక్‌ జంట ఏ దశలోనూ మలేసియా జంటను అందుకోలేదు. నిర్ణయాత్మక మూడో గేమ్‌లో గేర్లు మార్చిన భారత ద్వయం ఎలాంటి ఒత్తిడి పెంచుకోకుండా విజయాన్ని అందుకుంది. అంతకుముందు క్వార్టర్‌ఫైనల్లో సాత్విక్‌, చిరాగ్‌ జోడీ 15-21, 21-11, 21-14తో   జప్పే బే, లాసె మోల్హదె (డెన్మార్క్‌)ను ఓడించింది. ఈ టోర్నీలో భారత్‌ నుంచి పోటీలో ఉన్న షట్లర్లు వీరిద్దరు మాత్రమే. సింధు, శ్రీకాంత్‌, ప్రణయ్‌ నిష్క్రమించారు.