టైటిల్‌ పోరుకు సింధు

స్పెయిన్‌ మాస్టర్స్‌ బ్యాడ్మింటన్‌

మాడ్రిడ్‌: పి.వి.సింధు  ఈ సీజన్లో తొలి టైటిల్‌కు అడుగు దూరంలో నిలిచింది. ఈ తెలుగమ్మాయి స్పెయిన్‌ మాస్టర్స్‌ ఓపెన్లో ఫైనల్‌కు దూసుకెళ్లింది. శనివారం మహిళల సింగిల్స్‌ సెమీఫైనల్లో రెండో సీడ్‌ సింధు 24-22, 22-20తో యెజియా మిన్‌ (సింగపూర్‌)ను ఓడించింది. ఈ పోరులో భారత స్టార్‌కు ప్రత్యర్థి నుంచి గట్టిపోటీ ఎదురైంది. తొలి గేమ్‌లో 15-20తో వెనుకబడిన స్థితిలో గొప్పగా పుంజుకున్న సింధు 5 వరుస పాయింట్లతో స్కోరు సమం చేసింది. ఆ తర్వాత అదే జోరుతో గేమ్‌ గెలిచింది. రెండో గేమ్‌లోనూ నువ్వానేనా అన్నట్లు పోరు సాగింది. కానీ ఆరంభంలో 1-6తో వెనుకబడినా.. విరామ సమయానికి సింధు 11-6తో ఆధిక్యంలో నిలిచింది. బ్రేక్‌ తర్వాత మిన్‌ పుంజుకోవడంతో స్కోర్లు సమమవుతూ వెళ్లాయి. 20-20తో ఉన్న దశలో ఒత్తిడిని అధిగమించి వరుసగా రెండు పాయింట్లు దక్కించుకున్న సింధు.. గేమ్‌తో పాటు మ్యాచ్‌ను కైవసం చేసుకుంది. ఈ సీజన్లో ఆమెకిదే తొలి ఫైనల్‌.