ధోని కన్నీళ్లు పెట్టుకున్నాడు

దిల్లీ: టీమ్‌ఇండియాకు కెప్టెన్‌గా ఉన్నప్పుడైనా.. ఇటు ఐపీఎల్‌లో చెన్నై సూపర్‌ కింగ్స్‌కు సారథిగా ధోని మైదానంలో ఎంతో ప్రశాంతంగా ఉంటాడు. తన భావోద్వేగాలను నియంత్రించుకుంటాడు. కానీ అలాంటి ధోని కన్నీళ్లు పెట్టుకున్నాడంటా. ఈ విషయాన్ని సీఎస్కే మాజీ ఆటగాడు హర్భజన్‌ సింగ్‌ వెల్లడించాడు. ‘‘మీతో ఓ కథను పంచుకోవాలనుకుంటున్నా. రెండేళ్ల నిషేధం తర్వాత 2018లో తిరిగి ఐపీఎల్‌లో చెన్నై పునరాగమనం చేసింది. అప్పుడు ఓ సారి జట్టు విందు ఏర్పాటు చేశారు. ఆ రాత్రి ధోని ఏడ్చాడు. భావోద్వేగానికి గురయ్యాడు. దీని గురించి ఎవరికీ తెలియదనుకుంటా’’ అని ఓ షో సందర్భంగా చెప్పిన హర్భజన్‌.. పక్కనే ఉన్న ఇమ్రాన్‌ తాహిర్‌ను కూడా ఆ సంఘటన గురించి అడిగాడు. ‘‘అప్పుడు నేను కూడా అక్కడే ఉన్నా. అది ధోనీకి ఎంతో ఉద్విగ్నమైన క్షణం. అప్పుడు ధోనీని చూస్తే సీఎస్కే అతని హృదయానికి ఎంత దగ్గరగా ఉందో అర్థమైంది. ఈ జట్టును అతను కుటుంబంలా చూస్తాడు. ఆ సందర్భంలో అందరం భావోద్వేగానికి గురయ్యాం’’ అని తాహిర్‌ పేర్కొన్నాడు.