శ్రీకర్‌ భరత్‌కే జట్టు ఓటు

దుబాయ్‌: ఆస్ట్రేలియాతో ప్రపంచ టెస్టు ఛాంపియన్‌షిప్‌ (డబ్ల్యూటీసీ) ఫైనల్లో జట్టు వికెట్‌ కీపర్‌గా శ్రీకర్‌ భరత్‌నే టీమ్‌ఇండియా ఎంపిక చేసుకుంటుందని మాజీ చీఫ్‌ కోచ్‌ రవిశాస్త్రి అన్నాడు. ఇషాన్‌ కిషన్‌ కంటే ఇటీవల బోర్డర్‌- గావస్కర్‌ ట్రోఫీలో వికెట్‌ కీపింగ్‌ చేసిన భరత్‌ వైపే టీమ్‌ఇండియా మొగ్గుచూపుతుందని భావిస్తున్నట్లు రవిశాస్త్రి తెలిపాడు. ‘‘భరత్‌ లేదా ఇషాన్‌లలో ఎవరు మెరుగైన కీపర్‌ అన్నది చూడాలి. ఆసీస్‌తో సిరీస్‌లో భరత్‌కు అవకాశం లభించింది. అతను అన్ని మ్యాచ్‌లు ఆడాడు. కాబట్టి భరత్‌ స్పష్టమైన ఎంపిక అని అనుకుంటున్నా. కీపర్‌ ఎంపికపై ఓవల్‌ మైదానంలోని పరిస్థితులు కూడా ప్రభావం చూపుతాయి. ఇద్దరు స్పిన్నర్లు ఆడుతుంటే భరత్‌ ఉండాలని కోరుకుంటారు’’ అని రవిశాస్త్రి పేర్కొన్నాడు. ఇప్పటి వరకు భరత్‌ నాలుగు టెస్టులాడగా.. సుదీర్ఘ ఫార్మాట్లో ఇషాన్‌ అరంగేట్రం చేయలేదు.