సింధు ఔట్‌

మలేసియా మాస్టర్స్‌
ఫైనల్లో ప్రణయ్‌

కౌలాలంపూర్‌: భారత స్టార్‌ షట్లర్‌ పి.వి.సింధుకు నిరాశ. ఈ రెండుసార్లు ఛాంపియన్‌ మలేసియా మాస్టర్స్‌ బ్యాడ్మింటన్‌ టోర్నీలో సెమీఫైనల్లోనే నిష్క్రమించింది. శనివారం మహిళల సింగిల్స్‌ సెమీస్‌లో ఆరో సీడ్‌ సింధు 14-21, 17-21తో ఏడో సీడ్‌ మరిస్కా టాన్‌జంగ్‌ (ఇండోనేసియా) చేతిలో ఓడింది. ఈ పోరులో తన శైలి దూకుడును ప్రదర్శించలేకపోయిన సింధు.. అనవసర తప్పిదాలతో మూల్యం చెల్లించుకుంది. కానీ తొలి గేమ్‌ ఆరంభంలో సింధు మెరుగ్గానే ఆడింది. 3-0తో ఆధిక్యంలోకి వెళ్లిన ఆమె.. విరామ సమయానికి 11-8తో నిలిచింది. బ్రేక్‌ తర్వాత సింధు తడబడింది. పదునైన రిటర్న్‌లతో విజృంభించిన టాన్‌జంగ్‌ 15-12తో ఆధిక్యంలోకి వెళ్లింది. ఆ తర్వాతా అదే జోరుతో గేమ్‌ను సొంతం చేసుకుంది. రెండో గేమ్‌ కూడా హోరాహోరీగా సాగింది. స్కోరు 5-5తో ఉన్నప్పుడు మరిస్కా మోచేతికి గాయమైంది. అయితే ఇది ఆమె ఆటపై ప్రభావం చూపించలేకపోయింది. సింధు గట్టిగానే పోరాడినా బ్రేక్‌ సమయానికి మరిస్కా 11-9తో ఆధిక్యంలో నిలిచింది. విరామం తర్వాత కొన్ని మెరుపు షాట్లు ఆడిన భారత షట్లర్‌.. పుంజుకోవడానికి ప్రయత్నించింది. పట్టువదలని మరిస్కా ఆధిక్యాన్ని కాపాడుకోవడమే కాక గేమ్‌తో పాటు మ్యాచ్‌ను సొంతం చేసుకుంది. టాన్‌జంగ్‌పై గతంలో 7 మ్యాచ్‌లు నెగ్గిన సింధుకు ఇది వరుసగా రెండో ఓటమి. పురుషుల సింగిల్స్‌లో ప్రణయ్‌ ఫైనల్‌కు దూసుకెళ్లాడు. క్రిస్టియన్‌ అడింటా (ఇండోనేసియా)తో సెమీఫైనల్లో భారత స్టార్‌ తొలి గేమ్‌లో 19-17తో ఆధిక్యంలో ఉండగా.. ప్రత్యర్థి మోకాలి గాయంతో తప్పుకున్నాడు. ఒక షాట్‌ను ఎగిరి రిటర్న్‌ చేసే ప్రయత్నంలో క్రిస్టియన్‌ గాయపడి ఆటను కొనసాగించలేకపోయాడు.