యు టర్న్‌ లేదు.. రిటైర్మెంటే!

ఫైనల్‌తో ఐపీఎల్‌కు అంబటి వీడ్కోలు

అహ్మదాబాద్‌: ఐపీఎల్‌లో అత్యంత అనుభవజ్ఞులైన ఆటగాళ్లలో ఒకడైన అంబటి రాయుడు ఈ లీగ్‌కు గుడ్‌బై చెప్పేశాడు. గుజరాత్‌ టైటాన్స్‌తో ఫైనలే తనకు చివరి మ్యాచ్‌ అని ఈ చెన్నై సూపర్‌ కింగ్స్‌ ఆటగాడు ఆదివారం ట్విటర్‌లో ప్రకటించాడు. ఈ నిర్ణయంపై ‘యు టర్న్‌’ తీసుకోనని స్పష్టం చేశాడు. ‘‘రెండు గొప్ప జట్లు ముంబయి ఇండియన్స్‌, సీఎస్కే.. 204 మ్యాచ్‌లు, 14 సీజన్లు, 11 ప్లేఆఫ్స్‌, 8 ఫైనల్స్‌, 5 ట్రోఫీలు, ఈ రోజు ఆరోది కావొచ్చు. ఇది చాలా సుదీర్ఘమైన ప్రయాణం. ఈ ఫైనలే ఐపీఎల్‌లో నాకు చివరి మ్యాచ్‌. ఈ గొప్ప టోర్నీలో ఆడడాన్ని నిజంగా ఆస్వాదించా. అందరికీ ధన్యవాదాలు. ఇక యు టర్న్‌ ఉండదు’’ అని 37 ఏళ్ల రాయుడు ట్వీట్‌ చేశాడు. రాయుడు గతంలో రెండు సార్లు రిటైర్మెంట్‌ ప్రకటించి, ఆ తర్వాత మనసు మార్చుకున్నాడు. 2019 వన్డే ప్రపంచకప్‌కు ఎంపిక చేయకపోవడంతో అన్ని రకాల క్రికెట్‌కు గుడ్‌బై చెబుతున్నట్లు వెల్లడించాడు. కానీ ఆ తర్వాత దేశవాళీ, ఐపీఎల్‌లో కొనసాగుతానని చెప్పాడు. ఇక 2022 సీజనే తనకు ఐపీఎల్‌లో చివరిదని తెలిపాడు. కానీ సీఎస్కే మేనేజ్‌మెంట్‌ జోక్యంతో మళ్లీ నిర్ణయాన్ని వెనక్కి తీసుకున్నాడు. 2010-17 వరకు ముంబయికి ఆడిన రాయుడు.. ఆ జట్టు తరపున మూడు టైటిళ్లు (2013, 2015, 2017) గెలిచాడు. 2018 నుంచి సీఎస్కేకు ప్రాతినిథ్యం వహిస్తూ.. 2018, 2021లో విజేతగా నిలిచిన జట్టులో ఉన్నాడు. రోహిత్‌ (ఆరు) తర్వాత అత్యధిక ఐపీఎల్‌ టైటిళ్లు సొంతం చేసుకున్న ఆటగాడు రాయుడే. కానీ ఈ సీజన్‌లో మాత్రం ఫైనల్‌ ముందు వరకు 11 ఇన్నింగ్స్‌ల్లో 139 పరుగులే చేశాడు. శనివారం నాటికి రాయుడు ఐపీఎల్‌లో 203 మ్యాచ్‌లాడి 4329 పరుగులు చేశాడు. అందులో 22 అర్ధసెంచరీలు, ఓ శతకం ఉన్నాయి.