ప్రణయ్‌ ఆరేళ్ల తర్వాత..

సింగిల్స్‌ టైటిల్‌ సొంతం
ఖాతాలో మలేసియా మాస్టర్స్‌

కౌలాలంపూర్‌: హెచ్‌.ఎస్‌. ప్రణయ్‌ సాధించాడు. ఆరేళ్లుగా టైటిల్‌ కరవుతో ఉన్న అతడు ఎట్టకేలకు ప్రపంచ బ్యాడ్మింటన్‌ సమాఖ్య ప్రపంచ టూర్‌ టైటిల్‌ను పట్టేశాడు. మలేసియా మాస్టర్స్‌ సూపర్‌-500 టోర్నీలో అత్యుత్తమ ఆటతో అదరగొట్టిన భారత స్టార్‌ షట్లర్‌ విజేతగా నిలిచాడు. ఆదివారం పురుషుల సింగిల్స్‌ ఫైనల్లో ప్రణయ్‌ 21-19, 13-21, 21-18తో వెంగ్‌హంగ్‌ యంగ్‌ (చైనా)ను ఓడించాడు. తొలి గేమ్‌ ఆరంభంలో వాంగ్‌ 3-1తో ఆధిక్యంలోకి వెళ్లినా.. పుంజుకున్న ప్రణయ్‌ స్కోరు సమం చేశాడు. ఇద్దరూ తగ్గకపోవడంతో పోటీ హోరాహోరీగా సాగింది. కానీ విరామ సమయానికి ప్రణయ్‌ 11-10తో స్వల్ప ఆధిక్యంలో నిలిచాడు. బ్రేక్‌ తర్వాత కూడా భారత స్టార్‌కు ప్రత్యర్థి నుంచి గట్టి పోటీ ఎదురైంది. స్కోరు 19-19తో సమంగా ఉన్నప్పుడు.. వరుసగా రెండు పాయింట్లు సాధించిన ప్రణయ్‌ గేమ్‌ను సొంతం చేసుకున్నాడు. రెండో గేమ్‌లోనూ ఆట నువ్వానేనా అన్నట్లే సాగింది. సుదీర్ఘ ర్యాలీలు నడిచాయి. అయితే ఒక దశలో విజృంభించిన యంగ్‌.. వరుస పాయింట్లతో 17-11తో ఆధిక్యం సాధించడమే కాక అదే ఊపులో గేమ్‌ గెలిచి మ్యాచ్‌లో నిలిచాడు. మూడో గేమ్‌ ఆరంభంలో వెనుకబడినా.. బ్రేక్‌ సమయానికి ప్రణయ్‌ 11-10తో ఆధిక్యం సాధించాడు. విరామం తర్వాత యంగ్‌ నుంచి పోటీ ఎదురైనా.. మెరుపు క్రాస్‌కోర్టు షాట్లు, స్మాష్‌లతో భారత షట్లర్‌ 20-18తో విజయానికి చేరువయ్యాడు. అదే జోరుతో మరో పాయింట్‌ గెలిచి మ్యాచ్‌ను సొంతం చేసుకున్నాడు. గతేడాది చరిత్రాత్మక థామస్‌కప్‌ విజయంలో కీలకపాత్ర పోషించిన ప్రణయ్‌కి 2017 యుఎస్‌ ఓపెన్‌ తర్వాత దక్కిన తొలి సింగిల్స్‌ విజయమిదే.