నీకోసం ఏమైనా..

అహ్మదాబాద్‌: ఐపీఎల్‌ ఫైనల్లో విజయం అనంతరం సీఎస్కే ఆల్‌రౌండర్‌ రవీంద్ర జడేజా ట్విటర్లో పెట్టిన ఓ అందమైన పోస్ట్‌ అందరినీ ఆకట్టుకుంటోంది. కెప్టెన్‌ ధోని కోసం ఆ పెట్టిన పోస్ట్‌ వైరల్‌ అయింది. ‘‘ఒకే ఒక్కడి కోసం, ఒక్క ఎంఎస్‌ ధోని కోసం మేం ఇది సాధించాం. మహి భాయ్‌ నీకోసం ఏమైనా..’’ అని జడ్డూ ట్వీట్‌ చేశాడు. ఫైనల్లో చివరి రెండు బంతుల్లో 10 పరుగులు చేసిన జడేజా.. చెన్నై విజయంలో కీలక పాత్ర పోషించిన సంగతి తెలిసిందే. మొదట గుజరాత్‌ టైటాన్స్‌ 4 వికెట్లకు 214 పరుగులు చేయగా.. వర్షం కారణంగా 15 ఓవర్లకు 171 పరుగులకు సవరించిన లక్ష్యాన్ని చెన్నై ఆఖరి బంతికి ఛేదించింది. ‘మ్యాన్‌ ఆఫ్‌ ద మ్యాచ్‌’ కాన్వే (47), దూబె (32 నాటౌట్‌), రహానె (27), రుతురాజ్‌ (26), రాయుడు (19), జడేజా (15 నాటౌట్‌) చెన్నై విజయంలో కీలకపాత్ర పోషించారు.