అల్కరాస్‌ జోరు

మూడో రౌండ్లో ప్రవేశం
ఫ్రెంచ్‌ ఓపెన్‌

పారిస్‌: టైటిల్‌ ఫేవరెట్‌ అల్కరాస్‌ ఫ్రెంచ్‌ ఓపెన్‌లో మూడో రౌండ్‌కు దూసుకెళ్లాడు. రెండో రౌండ్లో టాప్‌ సీడ్‌ అల్కరాస్‌ 6-1, 3-6, 6-1, 6-2తో డానియల్‌పైను ఓడించాడు. మ్యాచ్‌లో అతడు 47 విన్నర్లు కొట్టాడు. అయిదో సీడ్‌ సిట్సిపాస్‌ (గ్రీస్‌), 11వ సీడ్‌ కచనోవ్‌ కూడా మూడో రౌండ్లో అడుగుపెట్టారు. సిట్సిపాస్‌ 6-3, 7-6 (4), 6-2తో రాబర్టో కర్బాలెస్‌ బయానాపై విజయం సాధించగా.. కచనోవ్‌ 6-3, 6-4, 6-2తో అల్బాట్‌ను మట్టికరిపించాడు. వావ్రింకా 6-3, 5-7, 3-6, 7-6 (7-4), 3-6తో కొకినాకిస్‌ చేతిలో కంగుతిన్నాడు. ఇతర రెండో రౌండ్‌ మ్యాచ్‌ల్లో ఫోగ్నిని 6-4, 7-6 (7-5), 6-2తో కుబ్లెర్‌పై, సొనెగో 6-4, 6-3, 7-6 (7-3)తో హంబర్ట్‌పై, ష్వార్జ్‌మాన్‌ 7-6 (7-3), 6-4, 6-3తో బోర్గెస్‌పై, ఆఫ్నర్‌ 6-3, 7-6 (7-1), 6-4తో కోర్డాపై విజయం సాధించారు.

పెగులా ముందుకు..: మహిళల సింగిల్స్‌లో రెండో సీడ్‌ సబలెంక (బెలారస్‌), మూడో సీడ్‌ జెస్సికా పెగులా (అమెరికా) మూడో రౌండ్‌కు దూసుకెళ్లారు. రెండో రౌండ్లో పెగులా 6-2తో ఆధిక్యంలో ఉన్న దశలో ప్రత్యర్థి కామిలా జియార్జి (ఇటలీ) గాయంతో రిటైరైంది. సబలెంక 7-5, 6-2తో షమినోవిచ్‌ (బెలారస్‌)పై విజయం సాధించింది. మ్యాచ్‌లో సబలెంక 21 విన్నర్లు కొట్టింది. 9వ సీడ్‌ కసాట్కినా 6-3, 6-4తో వొండ్రుసోవాను ఓడించి మూడో రౌండ్‌కు దూసుకెళ్లింది. మరో మ్యాచ్‌లో స్టీఫెన్స్‌ 6-2, 6-1తో గ్రచేవాపై విజయం సాధించింది. అయిదో సీడ్‌ గార్సియా మాత్రం రెండో రౌండ్‌ దాటలేకపోయింది. ఆమె 6-4, 3-6, 5-7తో బ్లిన్కోవా చేతిలో పరాజయంపాలైంది. మాజీ ఛాంపియన్‌ ఒస్తాపెంకో కథ కూడా ముగిసింది. రెండో రౌండ్లో ఆమె 3-6, 6-1, 2-6తో పేటాన్‌ సెర్ట్న్‌్స చేతిలో ఓడిపోయింది. ఇతర రెండో రౌండ్‌ మ్యాచ్‌ల్లో స్వితోలినా 2-6, 6-3, 6-1తో హంటర్‌పై, మెర్టెన్స్‌ 6-3, 7-6 (7-3) ఒసోరియాపై, పవ్లిచెంకోవా 4-6, 7-5, 7-5తో సమ్సనోవాపై నెగ్గారు. పుతిన్‌త్సెవా, బెగు, పొటపోవా, ముచోవా కూడా మూడో రౌండ్లో ప్రవేశించారు.

రెండో రౌండ్లో యుకి-సాకేత్‌ జోడీ: పురుషుల డబుల్స్‌లో యుకి బాంబ్రి, సాకేత్‌ మైనేని జంట శుభారంభం చేసింది. మొదటి రౌండ్లో ఈ జోడీ 6-3, 6-2తో కవాకాడ్‌, రిందర్‌నెచ్‌ ద్వయంపై నెగ్గింది. రోహన్‌ బోపన్న, ఎబ్డెన్‌ (ఆస్ట్రేలియా) జంట తొలి రౌండ్లోనే నిష్క్రమించింది. ఈ జోడీ 5-7, 6-7 (5-7)తో డౌంబియా, రెబౌల్‌ జంట చేతిలో ఓడిపోయింది. శ్రీరామ్‌ బాలాజి, జీవన్‌ నెదుంచెజియన్‌ జంట కూడా తొలి రౌండ్‌ను అధిగమించలేకపోయింది. ఈ ద్వయం 3-6, 4-6తో ఇవాష్క, పొపిరిన్‌ జోడీ చేతిలో ఓటమి చవిచూసింది.