పోప్‌ ద్విశతకం.. డకెట్‌ సెంచరీ

ఇంగ్లాండ్‌ 524/4 డిక్లేర్డ్‌

లార్డ్స్‌: ఐర్లాండ్‌తో ఏకైక టెస్టులో ఇంగ్లాండ్‌ విజయం దిశగా సాగుతోంది. తొలి ఇన్నింగ్స్‌లో ప్రత్యర్థిని 172 పరుగులకే కుప్పకూల్చిన ఇంగ్లిష్‌ జట్టు.. ఒలీ పోప్‌ (205; 208 బంతుల్లో 22×4, 3×6) ద్విశతకం, బెన్‌ డకెట్‌ (182; 178 బంతుల్లో 24×4, 1×6) శతకం సాయంతో తొలి ఇన్నింగ్స్‌లో 524/4 స్కోరు వద్ద డిక్లేర్‌ చేసింది. 352 పరుగుల భారీ ఆధిక్యాన్ని కూడా సొంతం చేసుకుంది. ఓవర్‌నైట్‌ స్కోరు 152/1తో తొలి ఇన్నింగ్స్‌ కొనసాగించిన ఇంగ్లాండ్‌.. దూకుడుగా ఆడింది. పోప్‌-డకెట్‌ జోడీ జోరుతో 6 పైన రన్‌రేట్‌తో పరుగులు రాబట్టింది. డబుల్‌ సెంచరీ ముంగిట డకెట్‌ ఔటైనా.. రూట్‌ (56)తో కలిసి పోప్‌ ఇంగ్లాండ్‌ స్కోరును 500 దాటించాడు. ఈ క్రమంలోనే అతడు ద్విశతకాన్ని అందుకున్నాడు. పోప్‌ ఔటైన వెంటనే ఇంగ్లాండ్‌ ఇన్నింగ్స్‌ డిక్లేర్‌ చేసింది. టంగ్‌ (3/27) ధాటికి రెండో ఇన్నింగ్స్‌లో తడబడ్డ ఐర్లాండ్‌.. రెండో రోజు ఆఖరికి 97/3తో నిలిచింది. ఆ జట్టు ఇంకా 255 పరుగులు వెనకబడి ఉంది. టెక్టార్‌ (33), టకర్‌ (21) క్రీజులో ఉన్నారు.

అఫ్గాన్‌ చేతిలో లంక ఓటమి

హంబాన్‌టోట: ప్రపంచకప్‌ క్వాలిఫయర్స్‌ ముంగిట అఫ్గానిస్థాన్‌ సిరీస్‌తో ఆత్మవిశ్వాసం పెంచుకోవాలనుకున్న శ్రీలంకకు ఆరంభంలోనే ఎదురుదెబ్బ! మూడు వన్డేల పోరులో భాగంగా గురువారం తొలి మ్యాచ్‌లో ఆ జట్టు 6 వికెట్ల తేడాతో అఫ్గాన్‌ చేతిలో ఓడిపోయింది. మొదట లంక 50 ఓవర్లలో 268 పరుగులు చేసింది. అసలంక (91; 95 బంతుల్లో 12×4) సత్తా చాటాడు. 84/4తో ఇబ్బందుల్లో పడిన జట్టును ధనంజయ డిసిల్వా (51; 59 బంతుల్లో 5×4)తో కలిసి అతడు ఆదుకున్నాడు. ఫారూఖీ (2/58), ఫరీద్‌ (2/43) లంకను కట్టడి చేశారు. ఛేదనలో ఇబ్రహీం జద్రాన్‌ (98; 98 బంతుల్లో 11×4, 2×6) సత్తా చాటడంతో లక్ష్యాన్ని అఫ్గాన్‌ 46.5 ఓవర్లలో 4 వికెట్లే కోల్పోయి అందుకుంది. రెండో వికెట్‌కు రహ్మత్‌ షా (55; 80 బంతుల్లో 3×4)తో ఇబ్రహీం 146 పరుగులు జత చేసి ఛేదనలో గట్టి పునాది వేశాడు. వీరి తర్వాత హస్మతుల్లా (38), నబి (27 నాటౌట్‌) జట్టును విజయపథంలో నడిపారు.