పోరాడి ఓడిన సేన్‌

థాయ్‌లాండ్‌ ఓపెన్‌

బ్యాంకాక్‌: థాయ్‌లాండ్‌ ఓపెన్‌ బ్యాడ్మింటన్‌ టోర్నమెంట్లో భారత్‌ కథ ముగిసింది. బరిలో మిగిలిన లక్ష్యసేన్‌ కూడా ఓడిపోయాడు. శనివారం హోరాహోరీగా సాగిన పురుషుల సింగిల్స్‌ సెమీఫైనల్లో లక్ష్య 21-13, 17-21, 13-21తో కున్లావత్‌ వితిద్‌సర్న్‌ (థాయ్‌లాండ్‌) చేతిలో పరాజయం చవిచూశాడు. తొలి గేమ్‌ ఆరంభంలో సేన్‌కు గట్టిపోటీ ఎదురైంది. విరామ సమయానికి భారత షట్లర్‌ 11-6తో నిలిచాడు. బ్రేక్‌ తర్వాత విజృంభించిన వితిద్‌సర్న్‌ 10-11తో సేన్‌ను సమీపించాడు. కానీ పట్టువదలని లక్ష్య.. ప్రత్యర్థికి అవకాశం ఇవ్వకుండా గేమ్‌ను సొంతం చేసుకున్నాడు. రెండో గేమ్‌లోనూ పోటీ నువ్వానేనా అన్నట్లు సాగింది. ఒక దశలో 10-10 స్కోరు సమమైంది. కానీ క్రాస్‌కోర్ట్‌ స్మాష్‌లతో చెలరేగిన కున్లావత్‌ ఆధిక్యంలోకి వెళ్లడమే కాక అదే జోరుతో గేమ్‌ను గెలిచి మ్యాచ్‌లో నిలిచాడు. నిర్ణయాత్మక మూడో గేమ్‌ ఆరంభంలో థాయ్‌ ఆటగాడు 5-2తో ఆధిక్యంలోకి వెళ్లినా.. సేన్‌ పుంజుకుని ప్రత్యర్థి స్కోరు సమం చేశాడు. అయితే ద్వితీయార్ధంలో అలసిపోయిన భారత స్టార్‌.. నెమ్మదిగా ఆటపై పట్టుకోల్పోయి 12-18తో వెనుకబడిపోయాడు. అదే ఊపులో కున్లావత్‌ గేమ్‌తో పాటు మ్యాచ్‌ను దక్కించుకున్నాడు.