గౌతమి-అభినవ్‌ జోడీకి స్వర్ణం

జూనియర్‌ ప్రపంచకప్‌ షూటింగ్‌

షల్‌ (జర్మనీ): జూనియర్‌ ప్రపంచకప్‌ షూటింగ్‌ టోర్నీలో భారత క్రీడాకారులు గౌతమి బానోత్‌, అభినవ్‌ షా స్వర్ణంతో మెరిశారు. ఆదివారం 10 మీటర్ల ఎయిర్‌ రైఫిల్‌ మిక్స్‌డ్‌ టీమ్‌ ఫైనల్లో గౌతమి-అభినవ్‌ జోడీ 17-7తో ముల్లర్‌-రొమైన్‌ (ఫ్రాన్స్‌)ను ఓడించారు. క్వాలిఫికేషన్లో రెండో స్థానం సాధించిన భారత జంట (628.3 పాయింట్లు) ఫైనల్లో అదిరే ప్రదర్శనతో పసిడి పట్టేసింది. కాంస్య పతక పోరులో నోర్‌-జెన్స్‌ (నార్వే) 17-13తో స్కియావాన్‌-లూకా (ఇటలీ)పై నెగ్గారు. 10 మీటర్ల ఎయిర్‌ పిస్టల్‌ మిక్స్‌డ్‌ ఫైనల్లో సైన్యం-అభినవ్‌ చౌదరి రజతం గెలుచుకున్నారు. ఫైనల్లో భారత జంట 12-16తో జురి-కిమ్‌ (కొరియా) జోడీ చేతిలో ఓడింది. ఇదే విభాగంలో సురుచి-శుభమ్‌ బిస్లా కంచు పతకం నెగ్గారు. కాంస్య పోరులో భారత ద్వయం 16-14తో నిగీనా-కమలోవ్‌ (ఉజ్బెకిస్థాన్‌)ను ఓడించారు. పురుషుల స్కీట్‌లో రితురాజ్‌్ 19, అభయ్‌సింగ్‌ 21వ స్థానాలతో సరిపెట్టుకోగా.. మహిళల్లో రిజా థిల్లాన్‌ 11, ముఫాదాల్‌ 14, సంజన సూద్‌ 16 స్థానాల్లో నిలిచారు.