సిద్ధార్థ్‌కు స్వర్ణం

యెచెయాన్‌ (కొరియా): ఆసియా అండర్‌-20 అథ్లెటిక్స్‌ ఛాంపియన్‌షిప్‌లో షాట్‌పుట్‌లో సిద్ధార్థ్‌ చౌదరి స్వర్ణంతో మెరిశాడు. సోమవారం అతడు గుండును అత్యుత్తమంగా 19.52 మీటర్ల దూరం విసిరి అగ్రస్థానంలో నిలిచాడు. శివమ్‌ (జావెలిన్‌ త్రో, 72.34 మీటర్లు), షారుక్‌ఖాన్‌ (3000 మీటర్ల స్టీఫుల్‌చేజ్‌, 8 నిమిషాల 51.74 సెకన్లు), సుస్మిత (లాంగ్‌జంప్‌, 5.96 మీటర్లు) రజతాలు సాధించారు. 4×400 మీటర్ల మిక్స్‌డ్‌ రిలే జట్టు (హీనా, దీపక్‌, అనుష్క, నవ్‌ప్రీత్‌, 3 నిమిషాల 30.12 సెకన్లు), షకీల్‌ (800 మీటర్లు, 1 నిమిషం 49.79 సెకన్లు) కాంస్య పతకాలు సొంతం చేసుకున్నారు. ఇప్పటిదాకా భారత్‌ 9 పతకాలతో (3 స్వర్ణ, 3 రజత, 3 కాంస్యాలు) మూడో స్థానంలో కొనసాగుతోంది.