సింధు నిష్క్రమణ.. ప్రిక్వార్టర్స్‌లో శ్రీకాంత్‌

సింగపూర్‌: భారత స్టార్‌ షట్లర్లు పి.వి.సింధు, హెచ్‌.ఎస్‌.ప్రణయ్‌ సింగపూర్‌ ఓపెన్‌ ప్రపంచ సూపర్‌ 750 టోర్నీలో తొలి రౌండ్లోనే నిష్క్రమించారు. మరో స్టార్‌ ఆటగాడు కిదాంబి శ్రీకాంత్‌ ప్రిక్వార్టర్‌ఫైనల్‌ చేరాడు. మంగళవారం జరిగిన మహిళల సింగిల్స్‌ తొలి రౌండ్లో సింధు 21-18, 19-21, 17-21తో ప్రపంచ నంబర్‌వన్‌ అకానె యమగూచి (జపాన్‌) చేతిలో పోరాడి ఓడింది. సైనా నెహ్వాల్‌ 13-21, 15-21తో రచనోక్‌ (థాయ్‌లాండ్‌) చేతిలో పరాజయం పాలైంది. పురుషుల సింగిల్స్‌ తొలి రౌండ్లో శ్రీకాంత్‌ 21-15, 21-19తో కాంటాఫాన్‌ (థాయ్‌లాండ్‌)పై విజయం సాధించగా.. ప్రణయ్‌ 15-21, 19-21తో నరవొక చేతిలో, లక్ష్యసేన్‌ 21-18, 17-21, 13-21తో చౌ తీన్‌ చెన్‌ (చైనీస్‌ తైపీ) చేతిలో ఓటమి పాలయ్యారు. ప్రియాంషు రజావత్‌ 21-12, 21-15తో సునెయామా (జపాన్‌)పై నెగ్గి ముందంజ వేశాడు.