అప్పుడే అహ్మదాబాద్‌లో ఆడతాం: ఐసీసీతో పాక్‌

కరాచి: ప్రపంచకప్‌లో భాగంగా అహ్మదాబాద్‌లో టీమ్‌ఇండియాతో మ్యాచ్‌ ఆడే విషయంలో ఐసీసీకి పాకిస్థాన్‌ క్రికెట్‌ బోర్డు (పీసీబీ) తమ అభ్యంతరాన్ని తెలియజేసింది. ఐసీసీ ఛైర్మన్‌ గ్రెగ్‌ బార్‌క్లే, జనరల్‌ మేనేజర్‌ జెఫ్‌ అలార్డైస్‌ ఇటీవల కరాచీలో పర్యటించినప్పుడు పీసీబీ ఈ విషయాన్ని ప్రస్తావించినట్లు తెలుస్తోంది. ‘‘ఫైనల్‌ వంటి నాకౌట్‌ మ్యాచ్‌ ఉంటే తప్ప అహ్మదాబాద్‌లో ఆడటం తమకు ఇష్టంలేదని బార్‌క్లే, అలార్డైస్‌కు పీసీబీ ఛైర్మన్‌ నజమ్‌ సేథీ స్పష్టంచేశాడు. భారత్‌లో జరిగే ప్రపంచకప్‌లో పాల్గొనేందుకు పాక్‌ ప్రభుత్వం అనుమతిస్తే తమ మ్యాచ్‌ల్ని చెన్నై, బెంగళూరు, కోల్‌కతాలలో నిర్వహించాలని ఐసీసీని కోరాడు’’ అని పీసీబీ వర్గాలు తెలిపాయి.