వన్డే సిరీస్‌ విండీస్‌ కైవసం

షార్జా: యూఏఈతో మూడు వన్డేల సిరీస్‌ను వెస్టిండీస్‌ మరో మ్యాచ్‌ మిగిలుండగానే కైవసం చేసుకుంది. రెండో వన్డేలో ఆ జట్టు 78 పరుగుల తేడాతో ఘన విజయం సాధించింది. మొదట విండీస్‌ 49.5 ఓవర్లలో 306 పరుగులకు ఆలౌటైంది. ఓపెనర్లు బ్రెండన్‌ కింగ్‌ (64; 70 బంతుల్లో 4×4, 4×6), జాన్సన్‌ చార్లెస్‌ (63; 47 బంతుల్లో 8×4, 3×6) అర్ధసెంచరీలతో గట్టి పునాది వేశారు. కార్టీ (32), ఒడియన్‌ స్మిత్‌ (37) రాణించి స్కోరును 300 దాటించారు. ఛేదనలో యూఏఈ 50 ఓవర్లలో 228/7కే పరిమితమైంది. ఆ జట్టు 95కే సగం వికెట్లు కోల్పోయినా.. అలీ నసీర్‌ (57), బాసిల్‌ హమీద్‌ (49) విండీస్‌ విజయాన్ని ఆలస్యం చేశారు. ఛేజ్‌ (2/49), హాడ్జ్‌ (2/46) విండీస్‌ విజయంలో కీలకపాత్ర పోషించారు.