SL VS AFG - Asia Cup 2023: అయ్యో అఫ్గాన్‌

త్రుటిలో చేజారిన సూపర్‌-4 బెర్త్‌
పోరాడి ఓడిన అఫ్గాన్‌
శ్రీలంక, బంగ్లా, ముందంజ
లాహోర్‌

దురదృష్టమంటే అఫ్గానిస్థాన్‌దేనేమో! ఆ జట్టు చేజేతులా ఆసియాకప్‌ సూపర్‌-4 బెర్తును చేజార్చుకుంది. శ్రీలంకతో ఉత్కంఠభరిత మ్యాచ్‌లో అర్హత సాధించడానికి అవకాశాలు ఉన్నా.. తెలివిగా ఆడకపోవడంతో అఫ్గాన్‌కు ఓటమి తప్పలేదు. ఆఖరిదాకా పట్టు వదలకుండా పోరాడిన లంక.. ఓడిపోవాల్సిన మ్యాచ్‌ను 2 పరుగుల స్వల్ప తేడాతో గెలిచి సూపర్‌-4లో అడుగుపెట్టింది. గ్రూప్‌-బిలో ఒక మ్యాచ్‌ గెలిచి, ఒక మ్యాచ్‌లో ఓడిన బంగ్లాదేశ్‌ కూడా ముందంజ వేసింది. ఆడిన రెండింట్లోనూ ఓడిన అఫ్గాన్‌ టోర్నీ నుంచి నిష్క్రమించింది.

అఫ్గానిస్థాన్‌కు తీవ్ర నిరాశ. శ్రీలంకపై గొప్పగా పోరాడినా.. ఆ జట్టు ఆసియాకప్‌లో సూపర్‌-4కు అర్హత సాధించలేకపోయింది. మంగళవారం లంక 2 పరుగుల తేడాతో అఫ్గాన్‌ను ఓడించింది. మొదట లంక 50 ఓవర్లలో 8 వికెట్లకు 291 పరుగులు చేసింది. కుశాల్‌ మెండిస్‌ (92; 84 బంతుల్లో 6×4, 3×6) టాప్‌ స్కోరర్‌. గుల్బాదిన్‌ నైబ్‌ (4/60), రషీద్‌ ఖాన్‌ (2/63) ప్రత్యర్థిని కట్టడి చేశారు. ఛేదనలో అఫ్గాన్‌ 37.4 ఓవర్లలో 289 పరుగులకు ఆలౌటైంది. మహ్మద్‌ నబి (65; 32 బంతుల్లో 6×4, 5×6), హష్మతుల్లా షాహిదీ (59; 66 బంతుల్లో 3×4, 1×6), రషీద్‌ (27 నాటౌట్‌; 16 బంతుల్లో 4×4, 1×6)ల పోరాటం సరిపోలేదు. లంక బౌలర్లలో రజిత (4/79) రాణించాడు.

ఆఖరి మెట్టుపై బోల్తా: సూపర్‌-4 చేరాలంటే 292 లక్ష్యాన్ని 37.1 ఓవర్లలో ఛేదించాల్సిన అఫ్గాన్‌కు ఆరంభంలోనే ఎదురుదెబ్బ తగిలింది. రహ్మనుల్లా గుర్బాజ్‌ (4), ఇబ్రహీం జాద్రాన్‌ (7) త్వరగా ఔటయ్యారు.  9 ఓవర్లకు 52/3తో ఆ జట్టు ఇబ్బందుల్లో పడింది. ఈ స్థితిలో హష్మతుల్లా షాహిదీ, రహ్మత్‌షా (45) ఇన్నింగ్స్‌ నిలబెట్టారు. 18 ఓవర్లకు 120/3తో అఫ్గాన్‌ లక్ష్యం దిశగా సాగింది. రహ్మత్‌ తర్వాత మహ్మద్‌ నబి దూకుడుగా ఆడడంతో అఫ్గాన్‌ స్కోరు పరుగులెత్తింది. కానీ తడబడిన అఫ్గాన్‌ 237/7తో పరాజయం ముంగిట నిలిచింది. సూపర్‌-4కు అర్హత సాధించాలంటే 31 బంతుల్లో 54 పరుగులు అవసరం కాగా.. రషీద్‌ ఖాన్‌, నజీబుల్లా జాద్రాన్‌ (23; 15 బంతుల్లో 1×4, 2×6) ధాటిగా ఆడి ఆశలు రేపారు. నజీబుల్లా ఔటైనా.. రషీద్‌ఖాన్‌ ఉండడంతో అఫ్గాన్‌ శిబిరంలో ఆశలు ఉన్నాయి. 6 బంతుల్లో 15 పరుగులు అవసరమైన స్థితిలో రషీద్‌ మూడు ఫోర్లే కొట్టడంతో అఫ్గాన్‌ 37 ఓవర్లకు 289/8తో నిలిచింది. 38వ ఓవర్‌ తొలి బంతికి 3 పరుగులు చేస్తే అఫ్గాన్‌ ముందంజ వేసేది. కానీ ఆ బంతికి ముజీబ్‌ ఔటైపోయాడు. దీంతో అఫ్గాన్‌ కథ ముగిసిందనే అనుకున్నారు. కానీ రన్‌రేట్‌ సమీకరణాల ప్రకారం ఆ ఓవర్‌ నాలుగో బంతి లోపు అఫ్గాన్‌ స్కోరు 295కు చేరినా ఆ జట్టు గెలిచేదని తేలింది. కానీ ఈ విషయం క్రీజులో ఉన్న బ్యాటర్లకు తెలియలేదు. రెండో బంతికి ఫారూఖీ సింగిల్‌ తీసి రషీద్‌కు స్ట్రైకింగ్‌ ఇచ్చినా.. అతను తర్వాతి   2 బంతుల్లో 6 పరుగులు కొట్టేసేవాడేమో. కానీ 2 బంతులు వృథా చేసిన ఫారూఖీ నాలుగో బంతికి ఔటైపోవడంతో అఫ్గాన్‌ పనైపోయింది.

శ్రీలంక ఇన్నింగ్స్‌: నిశాంక (సి) నజిబుల్లా (బి) నైబ్‌ 41; దిముత్‌ కరుణరత్నే (సి) నబి (బి) నైబ్‌ 32; కుశాల్‌ మెండిస్‌ రనౌట్‌ 92; సమరవిక్రమ (సి) గుర్బాజ్‌ (బి) నైబ్‌ 3; అసలంక (సి) అండ్‌ (బి) రషీద్‌ 36; ధనంజయ (బి) ముజీబ్‌ 14; శానక (బి) రషీద్‌ 5; వెల్లలగె నాటౌట్‌ 33; తీక్షణ (బి) నైబ్‌ 28; ఎక్స్‌ట్రాలు 7 మొత్తం: (50 ఓవర్లలో 8 వికెట్లకు) 291; వికెట్ల పతనం: 1-63, 2-80, 3-86, 4-188, 5-221, 6-226, 7-227, 8-291; బౌలింగ్‌: ఫారూఖీ 7-1-52-0; ముజీబ్‌ రెహ్మాన్‌ 10-0-60-1; నైబ్‌ 10-0-60-4; నబి 10-0-35-0; రషీద్‌ఖాన్‌ 10-0-63-2; కరీమ్‌ 3-0-20-0 అఫ్గానిస్థాన్‌ ఇన్నింగ్స్‌: గుర్బాజ్‌ (సి) కుశాల్‌ మెండిస్‌ (బి) రజిత 4; ఇబ్రహీం జద్రాన్‌ (బి) రజిత 7; నైబ్‌ ఎల్బీ (బి) పతిరన 22; రహ్మత్‌ షా (సి) పతిరన (బి) రజిత 45; హష్మతుల్లా (సి) రజిత (బి) వెల్లలగె 59; నబి (సి) ధనంజయ (బి) తీక్షణ 65; జనత్‌ (సి) కరుణరత్నె (బి) వెల్లలగె 22; నజీబుల్లా (సి) హేమంత (బి) రజిత 23; రషీద్‌ నాటౌట్‌ 27; ముజీబ్‌ (సి) సమరవిక్రమ (బి) ధనంజయ 0; ఫారూఖీ ఎల్బీ (బి) ధనంజయ 0; ఎక్స్‌ట్రాలు 15 మొత్తం: (37.4 ఓవర్లలో ఆలౌట్‌) 289; వికెట్ల పతనం: 1-10, 2-27, 3-50, 4-121, 5-201, 6-234, 7-237, 8-276, 9-289; బౌలింగ్‌: రజిత 10-0-79-4; తీక్షణ 10-0-62-1; వెల్లలగె 4-0-36-2; పతిరన 10-0-63-1; శానక 2-0-32-0; ధనంజయ 1.4-0-12-2