సమయం లేదు శ్రేయస్‌

 భారత బ్యాటర్‌పై తీవ్ర ఒత్తిడి
 ఆస్ట్రేలియాతో రెండో వన్డే నేడు
మధ్యాహ్నం 1.30 నుంచి

ఇందౌర్‌: ప్రపంచకప్‌ ముంగిట మిగిలింది రెండే మ్యాచ్‌లు. బ్యాటింగ్‌ ఆర్డర్లో కీలకమైన నాలుగో స్థానంలో ఆడబోతున్న శ్రేయస్‌ అయ్యర్‌ ఫిట్‌గానే ఉన్నాడా లేదా.. అతడి ఫామ్‌ సంగతేంటి.. ఈ ప్రశ్నలకు సమాధానాలు ఈ రెండు మ్యాచ్‌ల్లోనే తేలిపోవాలి. ఆస్ట్రేలియాతో తొలి వన్డేలో ఫిట్‌నెస్‌, ఫామ్‌ చాటుకునేందుకు మంచి అవకాశం లభించినా.. లేని పరుగుకు ప్రయత్నించి రనౌటైపోయాడు ఈ యువ బ్యాటర్‌. ఇప్పుడిక రెండో వన్డేకు రంగం సిద్ధమైంది. ఆదివారం నాటి ఈ మ్యాచ్‌లో అయినా శ్రేయస్‌ ఓ మంచి ఇన్నింగ్స్‌ ఆడాలని అభిమానులు కోరుకుంటున్నారు. శ్రేయస్‌ లాగే పెద్ద గాయంతో నెలల తరబడి ఆటకు దూరంగా ఉండి.. ఆసియా కప్‌తో పునరాగమనం చేసిన కేఎల్‌ రాహుల్‌ ఫిట్‌నెస్‌తో పాటు ఫామ్‌నూ చాటుకుని జట్టుకు భరోసానిస్తున్నాడు. అలాగే శ్రేయస్‌ కూడా ఊపందుకున్నాడంటే ప్రపంచకప్‌ ముంగిట భారత్‌కు పెద్ద భారం దిగిపోయినట్లే.
అతడికి తోడు అశ్విన్‌: అక్షర్‌ పటేల్‌ గాయం నేపథ్యంలో అనుకోకుండా జట్టులోకి వచ్చిన సీనియర్‌ ఆఫ్‌స్పిన్నర్‌ రవిచంద్రన్‌ అశ్విన్‌.. తొలి వన్డేలో ఓ మోస్తరు ప్రదర్శన చేశాడు. 10 ఓవర్లలో 47 పరుగులిచ్చి ఒక వికెట్‌ తీశాడు. ప్రపంచకప్‌లో అవకాశం దక్కించుకోవాలంటే అశ్విన్‌ ఇంకా మెరుగైన ప్రదర్శన చేయాల్సిందే. రెండో వన్డేలో శ్రేయస్‌, అశ్విన్‌లిద్దరిపై అందరి దృష్టి నిలిచి ఉంటుందనడంలో సందేహం లేదు. కెప్టెన్‌ రోహిత్‌తో పాటు కోహ్లి, హార్దిక్‌, కుల్‌దీప్‌ లాంటి కీలక ఆటగాళ్లు లేకుండానే తొలి మ్యాచ్‌లో భారత్‌ బౌలింగ్‌, బ్యాటింగ్‌లో ఆధిపత్యంతో ఆసీస్‌పై సునాయాస విజయం సాధించింది. సీనియర్‌ పేసర్‌ షమి చాన్నాళ్ల తర్వాత పతాక స్థాయి బౌలింగ్‌తో సత్తా చాటడం పెద్ద సానుకూలాంశం. మిగతా బౌలర్లూ ఆకట్టుకున్నారు కానీ.. శార్దూల్‌ ఠాకూర్‌ మాత్రం ధారాళంగా పరుగులిచ్చేశాడు. వికెట్‌ కూడా పడగొట్టలేకపోయాడు. అతను గాడిన పడకుంటే కష్టం. బ్యాటింగ్‌లో శ్రేయస్‌ మినహా బ్యాటర్లు మంచి లయతో కనిపిస్తున్నారు. శుభ్‌మన్‌, రాహుల్‌ ఫామ్‌ను కొనసాగించగా.. అనుకోకుండా అవకాశం దక్కించుకున్న రుతురాజ్‌ సైతం అదరగొట్టాడు. అతను ఆసియా కప్‌లో జట్టును నడిపించాల్సిన నేపథ్యంలో రెండో వన్డేకు తన స్థానంలో తిలక్‌ వర్మను ఆడిస్తారేమో చూడాలి.
ఆసీస్‌ ఏం చేస్తుందో..: ఆస్ట్రేలియా తొలి వన్డే ఓటమి తర్వాత కసితో రగిలిపోతూ ఉంటుందనడంలో సందేహం లేదు. దాదాపుగా పూర్తి స్థాయి జట్టుతోనే బరిలోకి దిగిన కంగారూలకు.. కీలక ఆటగాళ్లు లేని భారత్‌ చేతిలో ఓడిపోవడమంటే పరాభవం కిందే లెక్క. పేసర్లకు అనుకూలించే మొహాలి పిచ్‌ను ఆ జట్టు పెద్దగా ఉపయోగించుకోలేకపోయింది. ఇక స్పిన్‌కు సహకరించే ఇందౌర్‌లో ఆసీస్‌ ఏం చేస్తుందో చూడాలి. స్మిత్‌, వార్నర్‌, మిచెల్‌ మార్ష్‌ లాంటి సీనియర్ల నుంచి జట్టు భారీ ఇన్నింగ్స్‌లు ఆశిస్తోంది. బౌలింగ్‌లో జంపా నుంచి భారత బ్యాటర్లకు ముప్పు తప్పదు. హేజిల్‌వుడ్‌ అందుబాటులోకి రానుండటంతో ఆసీస్‌ పేస్‌ బలం పెరగొచ్చు. ఇందౌర్‌ పిచ్‌ బ్యాటింగ్‌కు కూడా అనుకూలం కాబట్టి భారీ స్కోర్లు నమోదు కావచ్చు.