ODI WC 2023: ట్రోఫీకి.. భారత్‌కు మధ్య!

ఈనాడు క్రీడావిభాగం

భారీ అంచనాల మధ్య వన్డే ప్రపంచకప్‌ బరిలో దిగుతోంది టీమ్‌ఇండియా. 1983లో కపిల్‌ డెవిల్స్‌, 2011లో ధోనీసేన తరహాలోనే రోహిత్‌ బృందం కూడా అద్భుత ఆటతీరుతో కప్పు పట్టేస్తుందని అభిమానులు బోలెడు ఆశలతో ఉన్నారు. చూడ్డానికి మన జట్టు బలంగానే కనిపిస్తోంది. ఇటీవలి ఫామ్‌ కూడా బాగుంది. కానీ కప్పు దారిలో ఎదురయ్యే సవాళ్లను అధిగమించడం రోహిత్‌సేనకు అంత తేలికేమీ కాదు. కప్పుకి,భారత్‌కు మధ్య కొన్ని జట్లు పెద్ద అడ్డంకులుగా నిలవడం ఖాయం.

ఆల్‌రౌండ్‌ బలంతో..

ప్రపంచకప్‌ వస్తుంటే న్యూజిలాండ్‌ మీద మరీ అంచనాలేమీ ఉండవు. ఆ జట్టు కూడా అంతగా హడావుడి చేయదు. కానీ టోర్నీలో నిలకడగా ఆడి ముందంజ వేస్తుంటుంది. ఫేవరెట్‌ జట్లకు చెక్‌ పెడుతుంటుంది. తొలి ప్రపంచకప్‌ కోసం ఆ జట్టు కొన్ని పర్యాయాల నుంచి గట్టిగా ప్రయత్నిస్తోంది. గత రెండు టోర్నీల్లోనూ కివీసే రన్నరప్‌. 2019లో టైటిల్‌కు అత్యంత చేరువగా వచ్చిన ఆ జట్టును దురదృష్టం వెంటాడింది. సూపర్‌ఓవర్లోనూ స్కోర్లు సమమైన మ్యాచ్‌లో ఇంగ్లాండ్‌ ఎక్కువ బౌండరీల ఆధారంగా విజేతగా నిలిచింది. ఈసారి బలమైన జట్టుతో బరిలోకి దిగుతున్న కివీస్‌.. అన్ని అడ్డంకులనూ దాటి కప్పు గెలవాలనుకుంటోంది. గాయం నుంచి కోలుకుని కెప్టెన్‌ విలియమ్సన్‌ అందుబాటులోకి రావడం ఆ జట్టుకు ఉపశమనం. డరైల్‌ మిచెల్‌, జిమ్మీ నీషమ్‌, గ్లెన్‌ ఫిలిప్స్‌, రచిన్‌ రవీంద్ర.. ఇలా మరే జట్టుకూ లేనంతమంది ఆల్‌రౌండర్లు కివీస్‌ సొంతం. కాన్వే, యంగ్‌, లేథమ్‌, నికోల్స్‌ లాంటి నాణ్యమైన స్పెషలిస్టు బ్యాటర్లూ ఉన్నారు. బౌల్ట్‌, సౌథీ, జేమీసన్‌లతో పేస్‌ బలం.. సోధి, రచిన్‌లతో భారత పిచ్‌లకు తగ్గ స్పిన్‌ బలమూ ఉంది. ఈ ఆల్‌రౌండ్‌ జట్టును దాటి కప్పు గెలవాలంటే భారత్‌ కష్టపడాల్సిందే.

కప్పు అంటే చాలు..

ప్రపంచకప్‌ ముంగిట చివరగా ఆడిన సిరీస్‌లో ఆస్ట్రేలియాను సులువుగా ఓడించేసింది భారత్‌. అంతమాత్రాన కంగారూలను తక్కువగా అంచనా వేస్తే కష్టమే.  ప్రపంచకప్‌ లాంటి మెగా టోర్నీల్లో ఎలా ఆడాలో ఆస్ట్రేలియాకు తెలిసినట్లు మరే జట్టుకూ తెలియదంటే అతిశయోక్తి కాదు. అందుకే ఆ జట్టు అయిదు టైటిళ్లు గెలవగలిగింది. తరాలు మారినా.. ఆటగాళ్లు మారినా ఆస్ట్రేలియా ప్రపంచకప్‌లో ఎప్పుడూ ఫేవరెట్టే. కెప్టెన్‌ కమిన్స్‌తో పాటు స్మిత్‌, స్టార్క్‌, మ్యాక్స్‌వెల్‌ లాంటి కీలక ఆటగాళ్లు ఫిట్‌నెస్‌ సమస్యలను అధిగమించి ప్రపంచకప్‌కు అందుబాటులోకి రావడంతో ఆ జట్టు బలం పెరిగింది. వార్నర్‌, మిచెల్‌ మార్ష్‌, హెడ్‌, లబుషేన్‌, స్టాయినిస్‌, జంపా మంచి ఫామ్‌లో ఉన్నారు. అన్ని విభాగాల్లో బలంగా కనిపిస్తున్న ఆసీస్‌ను లీగ్‌ మ్యాచ్‌లో భారత్‌ ఎలా ఎదుర్కొంటుందో చూడాలి. నాకౌట్‌లో ఆ జట్టు ఎదురైనా ఓడించడం అంత తేలిక కాదు.

భయపెట్టే దూకుడు

కప్పు జరుగుతోంది భారత్‌లో అయినా.. మన జట్టును కాదని దిగ్గజ ఆటగాడు గావస్కర్‌ ఇంగ్లాండ్‌ను టైటిల్‌ ఫేవరెట్‌గా పేర్కొన్నాడంటే ఆ జట్టు ఎంత బలంగా ఉందో అర్థం చేసుకోవచ్చు. కొన్నేళ్లుగా ఇంగ్లాండ్‌ ఆటతీరును చూస్తున్న వాళ్లకు సన్నీ అంచనా అతిగా ఏమీ అనిపించదు. టెస్టుల్లో అనుసరిస్తున్న ‘బజ్‌బాల్‌’ వ్యూహాన్ని వన్డేల్లో చాలా ఏళ్ల నుంచే అమలు చేస్తోంది ఆ జట్టు. 2015 వన్డే ప్రపంచకప్‌ వైఫల్యం తర్వాత వన్డేలు ఆడే తీరునే మార్చేసిందా జట్టు. ఆచితూచి ఆడే ఆటగాళ్లందరినీ పక్కన పెట్టి విధ్వంసక ఆటగాళ్లతో జట్టును నింపేసింది. నెమ్మదిగా ఆడే రూట్‌ సైతం తన ఆటతీరును మార్చుకోవాల్సి వచ్చింది. 8, 9 స్థానాల్లో కూడా బ్యాటింగ్‌ చేసే ఆటగాళ్లుండటంతో క్రీజులో అడుగు పెట్టిన దగ్గర్నుంచి ప్రతి బ్యాటర్‌ బాదడమే పనిగా పెట్టుకుంటున్నాడు. నాకౌట్‌లో ఇంగ్లిష్‌ జట్టు ఎదురై, వాళ్ల సహజశైలిలో రెచ్చిపోతే భారత్‌ పరిస్థితి ఏంటన్నది ప్రశ్న. నిరుడు టీ20 ప్రపంచకప్‌ సెమీస్‌లో పది వికెట్ల తేడాతో ఇంగ్లాండ్‌ మిగిల్చిన పరాభవాన్ని టీమ్‌ఇండియా మరిచిపోయి ఉండదు. ఇంగ్లాండ్‌కు మరో జట్టయినా అడ్డుకట్ట వేయాలి. లేదా నాకౌట్లో ఆ జట్టు ఎదురైతే రోహిత్‌ సేన పక్కా ప్రణాళికతో దెబ్బ కొట్టాలి. లేదంటే కప్పుపై ఆశలు వదులుకోవాల్సిందే.