Icc World Cup 2023: ఐసీసీ ప్రపంచకప్‌ జట్టు కెప్టెన్‌గా రోహిత్‌

దుబాయ్‌: టీమ్‌ఇండియా సారథి రోహిత్‌ శర్మ.. ఐసీసీ ప్రపంచకప్‌ జట్టు కెప్టెన్‌గా ఎంపికయ్యాడు. ప్రపంచకప్‌లో ఆటగాళ్ల ప్రదర్శన ఆధారంగా ఐసీసీ 11 మందితో కూడిన జట్టును ప్రకటించింది. ‘ప్లేయర్‌ ఆఫ్‌ ద టోర్నీ’ విరాట్‌ కోహ్లి సహా ఆరుగురు భారత ఆటగాళ్లు ఈ జట్టులో ఉన్నారు. టోర్నీలో దూకుడైన బ్యాటింగ్‌తో రోహిత్‌ జట్టును ముందుండి నడిపించాడు. ప్రపంచకప్‌లో అత్యధిక పరుగులు చేసిన ఆటగాళ్లతో జాబితాలో రెండో స్థానంలో నిలిచాడు. కోహ్లి.. టోర్నీ టాప్‌స్కోరర్‌గా, ప్లేయర్‌ ఆఫ్‌ ద మ్యాచ్‌’గా నిలిచిన సంగతి తెలిసిందే. కేఎల్‌ రాహుల్‌, రవీంద్ర జడేజా, జస్‌ప్రీత్‌ బుమ్రా, మహ్మద్‌ షమి.. ఐసీసీ జట్టులో స్థానం దక్కించుకున్న ఇతర భారత ఆటగాళ్లు. టోర్నీ విజేత ఆస్ట్రేలియా నుంచి మ్యాక్స్‌వెల్‌, అడమ్‌ జంపాలకు స్థానం లభించింది.

ఐసీసీ టీమ్‌ ఆఫ్‌ ద టోర్నీ: రోహిత్‌ శర్మ (కెప్టెన్‌), క్వింటన్‌ డికాక్‌, విరాట్‌ కోహ్లి, డరిల్‌ మిచెల్‌, కేఎల్‌ రాహుల్‌ (వికెట్‌కీపర్‌), గ్లెన్‌ మ్యాక్స్‌వెల్‌, రవీంద్ర జడేజా, బుమ్రా, మహ్మద్‌ షమి, ఆడమ్‌ జంపా, దిల్షాన్‌ మదుశంక, గెరాల్డ్‌ కొయెట్జీ (12వ ఆటగాడు)