IPL 2022: ఐపీఎల్‌ జట్టుపై రణ్‌వీర్‌ దంపతుల ఆసక్తి!

దిల్లీ: బాలీవుడ్‌లో శక్తిమంతమైన జంటల్లో ఒకటైన రణ్‌వీర్‌ సింగ్‌, దీపిక పదుకొనె ఓ ఐపీఎల్‌ జట్టును కొనుగోలు చేయడంపై ఆసక్తి చూపిస్తున్నట్లు సమాచారం. వచ్చే ఏడాది నుంచి ఐపీఎల్‌లో రెండు కొత్త జట్లను చేరుస్తున్నట్లు బీసీసీఐ ప్రకటించిన సంగతి తెలిసిందే. దీంతో ఈ లీగ్‌లో పోటీపడే జట్ల సంఖ్య పదికి పెరుగుతుంది. ఇప్పుడీ రెండు కొత్త జట్లలో ఒకటిని సొంతం చేసుకునేందుకు ఈ దంపతులు ప్రయత్నిస్తున్నట్లు వార్తలొస్తున్నాయి. ఓ ఫ్రాంఛైజీ కోసం వీళ్లు బిడ్‌ దాఖలు చేయనున్నట్లు తెలుస్తోంది. ఇప్పటికే బాలీవుడ్‌ నుంచి షారుక్‌ ఖాన్‌, జూహి చావ్లా.. కోల్‌కతా నైట్‌రైడర్స్‌కు యజమానులుగా ఉన్నారు. గతంలో రాజస్థాన్‌ రాయల్స్‌ జట్టు కోసం శిల్పా శెట్టి దంపతులు పెట్టుబడి పెట్టారు. పంజాబ్‌ కింగ్స్‌ సహ యజమానిగా ప్రీతిజింటా కొనసాగుతోంది.