IND vs NZ: అజాజ్‌కు అశ్విన్‌ ప్రత్యేక కానుక

ముంబయి: ప్రత్యర్థి జట్టయినా అత్యుత్తమంగా రాణించే ఆటగాడిని అభినందించే దృశ్యాలు క్రికెట్లో కనిపిస్తుంటాయి. సోమవారం అలాంటి సన్నివేశమే పునరావృతమైంది. రెండో టెస్టు తొలి ఇన్నింగ్స్‌లో పదికి పది వికెట్లు తీసి ఆ ఘనత సాధించిన మూడో బౌలర్‌గా రికార్డు సృష్టించిన కివీస్‌ స్పిన్నర్‌ అజాజ్‌ పటేల్‌కు అశ్విన్‌ ప్రత్యేక కానుక అందించాడు. మ్యాచ్‌ ముగిశాక భారత జట్టు ఆటగాళ్ల సంతకాలతో కూడిన తన జెర్సీని అతనికిచ్చాడు. ‘‘డ్రెస్సింగ్‌ గది నుంచి అజాజ్‌ బౌలింగ్‌ను ఎంతో ఆస్వాదించా. నా సహచరులు సంతకాలు చేసిన జెర్సీని నేనే అందుకుంటానేమో అనుకున్నా’’ అని అశ్విన్‌ తెలిపాడు. ‘‘జెర్సీ అందుకున్న ఆనందాన్ని చెప్పలేను. అసలు మాటలు రావడం లేదు’’ అని అజాజ్‌ సంతోషం వ్యక్తం చేశాడు. మరోవైపు ముంబయి క్రికెట్‌ సంఘం (ఎంసీఏ) అధ్యక్షుడు విజయ్‌ పాటిల్‌ కూడా అజాజ్‌ను సత్కరించాడు. త్వరలో ప్రారంభం కాబోయే ఎంసీఏ మ్యూజియానికి అజాజ్‌.. బంతిని, తన టీషర్ట్‌ను అందించాడు.