రెండో వన్డేలో ఐర్లాండ్‌ విజయం

కింగ్‌స్టన్‌: రెండో వన్డేలో వెస్టిండీస్‌పై ఐర్లాండ్‌ పైచేయి సాధించింది. గురువారం వర్షం అంతరాయం కలిగించిన ఈ మ్యాచ్‌లో ఐర్లాండ్‌ అయిదు వికెట్ల తేడా (డక్‌వర్త్‌ లూయిస్‌ ప్రకారం)తో విండీస్‌పై గెలుపొందింది. మూడు వన్డేల సిరీస్‌ను 1-1తో సమం చేసింది. మొదట బ్యాటింగ్‌ చేసిన విండీస్‌ 48 ఓవర్లలో 229 పరుగులకు ఆలౌటైంది. బ్రూక్స్‌ (43), షెఫర్డ్‌ (50), స్మిత్‌ (46) రాణించారు. ‘మ్యాన్‌ ఆఫ్‌ ద మ్యాచ్‌’ ఆండీ మెక్‌బ్రైన్‌ (4/36), క్రెయిగ్‌ యంగ్‌ (3/42)లు విండీస్‌ను కట్టడి చేశారు. అనంతరం ఆట నిలిచే సమయానికి ఐర్లాండ్‌ 32.3 ఓవర్లలో 5 వికెట్లకు 168 పరుగులు సాధించింది. వర్షం తగ్గకపోవడంతో డక్‌వర్త్‌ లూయిస్‌ పద్ధతి ప్రకారం మరో 21 బంతులు మిగిలివుండగానే 5 వికెట్ల తేడాతో ఐర్లాండ్‌ విజేతగా నిలిచినట్లు ప్రకటించారు. ఐర్లాండ్‌ బ్యాటర్లలో హారీ టెక్టర్‌ (53 నాటౌట్‌), ఆండీ మెక్‌బ్రైన్‌ (35) రాణించారు. ఆదివారం మూడో వన్డే జరుగనుంది.