ప్రి క్వార్టర్స్‌లో మెద్వెదెవ్‌

సబలెంక, సిట్సిపాస్‌ కూడా

పవ్లిచెంకోవా, రుబ్లెవ్‌కు షాక్‌

మెల్‌బోర్న్‌

ఆస్ట్రేలియన్‌ ఓపెన్‌ టైటిల్‌ ఫేవరేట్‌ మెద్వెదెవ్‌ దూకుడు కొనసాగిస్తున్నాడు. ఈ 25 ఏళ్ల రష్యా ఆటగాడు తిరుగులేని ఆటతో వరుసగా నాలుగో ఏడాదీ ఈ టోర్నీ ప్రి క్వార్టర్స్‌లో అడుగు పెట్టాడు. రెండో గ్రాండ్‌స్లామ్‌ టైటిల్‌ అందుకునే దిశగా దూసుకెళ్తున్నాడు. మహిళల సింగిల్స్‌లో రెండో సీడ్‌ సబలెంక మూడో రౌండ్‌ దాటింది. మరోవైపు అయిదో సీడ్‌ రుబ్లెవ్‌, పదో సీడ్‌ పవ్లిచెంకోవా పోరాటం ముగిసింది.

డిఫెండింగ్‌ ఛాంపియన్‌ జకోవిచ్‌ లేని టోర్నీలో టైటిల్‌పై కన్నేసిన ప్రపంచ రెండో ర్యాంకర్‌ మెద్వెదెవ్‌ (రష్యా) మరో అడుగు ముందుకేశాడు. శనివారం పురుషుల సింగిల్స్‌ మూడో రౌండ్లో ఈ రెండో సీడ్‌ ఆటగాడు 6-4, 6-4,  6-2 తేడాతో జాండ్‌షూప్‌ (నెదర్లాండ్స్‌)పై గెలిచి ప్రి క్వార్టర్స్‌ చేరాడు. ప్రత్యర్థిపై పూర్తి ఆధిపత్యం ప్రదర్శించిన అతను గంటా 55 నిమిషాల్లో మ్యాచ్‌ ముగించాడు. తొలి సెట్‌ మూడో గేమ్‌లో జాండ్‌షూప్‌ సర్వీస్‌ను బ్రేక్‌ చేసిన అతను ఆధిక్యం సాధించాడు. ప్రత్యర్థి నుంచి కాస్త ప్రతిఘటన ఎదురైనా పెత్తనం చలాయించిన మెద్వెదెవ్‌ తొలి సెట్‌ ఖాతాలో వేసుకున్నాడు. రెండో సెట్లో అతను మరింతగా చెలరేగాడు. ప్రత్యర్థికి పాయింట్లు కోల్పోకుండా వరుసగా రెండు గేమ్‌లు గెలిచి 3-1తో ఆధిక్యం సాధించాడు. ఆ దశలో ప్రత్యర్థి పుంజుకోవాలని ప్రయత్నించినా ఆ అవకాశం ఇవ్వని అతను ఆ సెట్‌ సొంతం చేసుకున్నాడు. ఇక మూడో సెట్లో అతను ఏస్‌లు, విన్నర్లతో విరుచుకుపడ్డాడు. కేవలం రెండు గేమ్‌లు మాత్రమే కోల్పోయి ఆ సెట్‌తో పాటు మ్యాచ్‌ దక్కించుకున్నాడు. ఈ పోరులో 10 ఏస్‌లు, 26 విన్నర్లు కొట్టాడు. నాలుగో సీడ్‌ సిట్సిపాస్‌ (గ్రీస్‌) 6-3, 7-5, 6-7 (2-7),  6-4తో పెయిర్‌ (ఫ్రాన్స్‌)ను ఓడించాడు. తొలి సెట్‌ను సులభంగానే గెలుచుకున్న అతనికి.. రెండు, మూడో సెట్లో ప్రత్యర్థి నుంచి ప్రతిఘటన ఎదురైంది. రెండో సెట్‌ను అతి కష్టం మీద నెగ్గిన అతనికి మూడో సెట్లో మాత్రం ఓటమి తప్పలేదు. కానీ ఆ దశలో ఆత్మవిశ్వాసం కోల్పోకుండా పోరాటం సాగించిన సిట్సిపాస్‌ నాలుగో సెట్‌లో మళ్లీ  ఆధిపత్యం ప్రదర్శించి విజయాన్ని సొంతం  చేసుకున్నాడు. అయిదో సీడ్‌ రుబ్లెవ్‌ (రష్యా) 5-7,  6-7 (3-7), 6-3, 3-6తో 27వ సీడ్‌ సిలిచ్‌ (క్రొయేషియా) చేతిలో ఓడాడు. అనుభవజ్ఞుడైన సిలిచ్‌పై గెలిచేందుకు రుబ్లెవ్‌ పోరాటం సరిపోలేదు. 20వ సీడ్‌ ఫ్రిట్జ్‌ (అమెరికా)    6-0, 3-6, 3-6, 6-4, 6-3తో 15వ సీడ్‌ అగట్‌ (స్పెయిన్‌)పై నెగ్గాడు. అగర్‌, సిన్నర్‌, డిమినార్‌ కూడా ముందంజ వేశారు.

సబలెంక జోరు: మహిళల సింగిల్స్‌లో రెండో సీడ్‌ సబలెంక జోరు కొనసాగుతోంది. మూడో రౌండ్లో ఈ బెలారస్‌ భామ 4-6, 6-3, 6-1తో మార్కెటా (చెక్‌ రిపబ్లిక్‌)పై నెగ్గి ప్రి క్వార్టర్స్‌ గడప తొక్కింది. తొలి సెట్లో సబలెంక వెనకబడింది. తొలి గేమ్‌లోనే ఆమె సర్వీస్‌ను బ్రేక్‌ చేసిన మార్కెటా చూస్తుండగానే 3-1తో ఆధిక్యం సాధించింది. ఆ దశలో వరుసగా రెండు గేమ్‌లు గెలిచిన సబలెంక స్కోరు సమం చేసింది. కానీ చివర్లో పట్టు విడిచి సెట్‌ కోల్పోయింది. ఆ ఓటమి నుంచి అద్భుతంగా పుంజుకున్న ఆమె రెండో సెట్లో వరుసగా తొలి మూడు గేమ్‌లు గెలిచి సత్తాచాటింది. నిర్ణయాత్మక చివరి సెట్లో మరింత చెలరేగింది. ఏడో సీడ్‌ స్వైటక్‌ (పోలెండ్‌)  6-2, 6-3తో కాసట్కినా (రష్యా)పై, 14వ సీడ్‌ హలెప్‌ (రొమేనియా)  6-2, 6-1తో కొవినిచ్‌ (మాంటెనెగ్రో)పై    గెలిచారు. కొలిన్స్‌, కనెపి, మార్టెన్స్‌ కూడా ప్రి క్వార్టర్స్‌ చేరారు. మరోవైపు పదో సీడ్‌ పవ్లిచెంకోవా (రష్యా) 3-6, 6-2, 2-6తో క్రిస్టీ (రొమేనియా) చేతిలో, జిదాన్సెక్‌ (స్లోవేనియా) 6-4, 4-6, 2-6తో కార్నెట్‌ (ఫ్రాన్స్‌) చేతిలో ఓడారు.

బోపన్నకు నిరాశే: పురుషుల డబుల్స్‌లో తొలి రౌండ్లోనే ఇంటి ముఖం పట్టిన భారత ఆటగాడు బోపన్నకు మిక్స్‌డ్‌ డబుల్స్‌లోనూ నిరాశే ఎదురైంది. జురాక్‌ (క్రొయేషియా)తో కలిసి మిక్స్‌డ్‌ డబుల్స్‌లో అతను మొదటి రౌండ్‌ దాటలేకపోయాడు. బోపన్న- జురాక్‌ జోడీ 6-1, 4-6 (9-11) తేడాతో కిచెనాక్‌  (ఉక్రెయిన్‌)- గొలుబెవ్‌ (కజకిస్థాన్‌) ఓడింది.