ఫైనల్‌ బెర్తుపై భారత్‌ గురి

కొరియాతో సెమీస్‌ పోరు నేడు
మహిళల ఆసియా కప్‌ హాకీ

మస్కట్‌: మహిళల ఆసియా కప్‌ హాకీ టోర్నీలో డిఫెండింగ్‌ ఛాంపియన్‌ భారత్‌ ఫైనల్‌ బెర్తుపై గురిపెట్టింది. బుధవారం జరిగే సెమీఫైనల్లో కొరియాను చిత్తుచేసి ఫైనల్లోకి దూసుకెళ్లాలని భావిస్తోంది. తొలి మ్యాచ్‌లో 9-0తో మలేసియాపై గెలిచి టోర్నీని ఘనంగా మొదలుపెట్టిన టాప్‌సీడ్‌ భారత్‌.. రెండో పోరులో 0-2తో జపాన్‌ చేతిలో ఓడింది. మూడో మ్యాచ్‌లో 9-1తో సింగపూర్‌పై విజయంతో పుంజుకున్న భారత్‌ ఆత్మవిశ్వాసంతో సెమీస్‌ చేరుకుంది. సవిత పూనియా సారథ్యంలోని జట్టు సెమీస్‌లో నూటికి నూరు శాతం ప్రదర్శన కనబరచాలని అనుకుంటోంది. ఇప్పటి వరకు బాగానే ఆకట్టుకున్న భారత జట్టు ఎక్కువగా ఫీల్డ్‌ గోల్స్‌ సాధించింది. పెనాల్టీ కార్నర్‌లను గోల్స్‌గా మలచడంలో విఫలమైంది. సింగపూర్‌తో మ్యాచ్‌లో డ్రాగ్‌ఫ్లికర్‌ గుర్జిత్‌కౌర్‌ ‘హ్యాట్రిక్‌’ సాధించినా పెనాల్టీ కార్నర్‌ల విషయంలో భారత్‌ వైఫల్యం స్పష్టంగా కనిపించింది. 15 పెనాల్టీ కార్నర్‌ అవకాశాలు లభించగా.. అందులో మూడింటిని మాత్రమే గోల్స్‌గా మలచడం ఆందోళన కలిగించేదే. అయితే పార్వర్డ్‌లతో పాటు డిఫెండర్లు కూడా సత్తాచాటితే భారత్‌కు తిరుగుండదు.