ప్రపంచకప్‌ షూటింగ్‌కు ఇషా

దిల్లీ: ఇటలీలోని కైరోలో ఫిబ్రవరి 26న ఆరంభమయ్యే ఐఎస్‌ఎస్‌ఎఫ్‌ ప్రపంచకప్‌కు హైదరాబాదీ యువ షూటర్‌ ఇషా సింగ్‌ ఎంపికైంది. ఈ టోర్నీలో మహిళల 10 మీటర్ల ఎయిర్‌ పిస్టల్‌, 15 మీటర్ల స్పోర్ట్స్‌ పిస్టల్‌ విభాగాల్లో ఇషా పోటీపడనుంది. 25 మీటర్ల మిక్స్‌డ్‌, 10 మీటర్ల ఎయిర్‌ పిస్టల్‌ మిక్స్‌డ్‌ టీమ్‌ విభాగాల్లోనూ ఆమె బరిలో ఉంది. అయితే సెలక్షన్‌ ప్రమాణాలను అందుకోలేకపోయిన కారణంగా టాప్‌ షూటర్లు మను బాకర్‌, అపూర్వి చందెలా, అంజుం మౌద్గిల్‌ తదితరులు ఈ టోర్నీకి దూరమయ్యారు. ‘‘భారత్‌లో కరోనా పరిస్థితుల దృష్ట్యా జనవరిలో  జరిగాల్సిన సెలక్షన్‌ ట్రయల్స్‌ వాయిదా పడ్డాయి. ప్రపంచకప్‌కు ఎంపిక చేయడానికి సెలక్షన్స్‌ నిర్వహించే సమయం లేదు. అందుకే తాజా జాతీయ షూటింగ్‌లో ప్రతి విభాగంలో క్వాలిఫికేషన్‌ స్కోరు, ఫైనల్‌ ర్యాంకు ఆధారంగా ప్రపంచకప్‌కు వెళ్లే షూటర్లను ఎంపిక చేశాం’’ అని జాతీయ రైఫిల్‌ సంఘం తెలిపింది.