ఆ మ్యాచ్‌లన్నీ క్వీన్స్‌టౌన్‌లో

ఆక్లాండ్‌: భారత మహిళల క్రికెట్‌ జట్టుతో నిర్వహించాల్సిన అయిదు వన్డేలు, ఏకైక టీ20 మ్యాచ్‌ను న్యూజిలాండ్‌ క్రికెట్‌ బోర్డు క్వీన్స్‌టౌన్‌కు తరలించింది. కరోనా నేపథ్యంలో ముప్పును తగ్గించేందుకు కివీస్‌ బోర్డు గురువారం తాజాగా కొత్త షెడ్యూల్‌ ప్రకటించింది. ఈ పర్యటన కోసం భారత జట్టు ఇప్పటికే న్యూజిలాండ్‌ చేరుకుంది. ఫిబ్రవరి 9న క్వీన్స్‌టౌన్‌లోని జాన్‌ డేవిస్‌ ఓవల్‌లో ఈ సిరీస్‌ ఆరంభం కానుంది. అంతేకాక వంద మందికి మించి వీక్షకులను స్టేడియానికి అనుమతించకూడదని కివీస్‌ బోర్డు నిర్ణయించింది. ఇంతకుముందు షెడ్యూల్‌ ప్రకారం ఫిబ్రవరి 9న ఏకైక టీ20తో పాటు 11న తొలి వన్డేను కూడా నేపియర్‌లో భారత్‌ ఆడాల్సి ఉంది. రెండు, మూడు వన్డేలకు నెల్సన్‌ (14, 16 తేదీలు).. నాలుగు, అయిదు వన్డేలకు క్వీన్స్‌టౌన్‌ 22, 24 తేదీలు) వేదికగా వ్యవహరించాల్సి ఉంది. ఈ మార్చి-ఏప్రిల్‌లో ప్రపంచకప్‌ ఉన్న నేపథ్యంలో భారత జట్టుకు ఈ సిరీస్‌ చాలా కీలకం కానుంది.