Australia Open: నువ్వు దద్దమ్మవా..? అంపైర్‌పై మెద్వెదెవ్‌ చిందులు

ఇంటర్నెట్‌డెస్క్‌: మెద్వెదెవ్‌కు కోపమొచ్చింది. సిట్సిపాస్‌తో సెమీఫైనల్‌ సందర్భంగా అతను చైర్‌ అంపైర్‌ కాంపిస్టోల్‌పై చిందులు తొక్కాడు. స్టాండ్స్‌లో ఉన్న సిట్సిపాస్‌ తండ్రి కొడుక్కి నిబంధనలకు విరుద్ధంగా సూచనలు ఇస్తుండటం, ఎంతకీ అంపైర్‌ స్పందించకపోవడంతో అతను తీవ్ర ఆగ్రహం వ్యక్తం చేశాడు. విరామ సమయంలో కుర్చీలో కూర్చుని ఉన్న అంపైర్‌ వైపు కోపంగా చూస్తూ.. ‘‘నువ్వేమైనా దద్దమ్మవా? అతడికి తండ్రి శిక్షణ ఇస్తుంటే నీకు కనిపించడం లేదా? నా ప్రశ్నకు జవాబు చెప్పు’’ అంటూ అరిచాడు. అతడికేదో సర్ది చెప్పి.. అంపైర్‌ తల పక్కకు తిప్పగా.. ‘‘నేను నీతో మాట్లాడుతున్నాను. నా ప్రశ్నకు జవాబు చెప్పు’’ అంటూ మెద్వెదెవ్‌ ఆగ్రహంతో ఊగిపోయాడు. మ్యాచ్‌ పూర్తయ్యాక కూడా అంపైర్‌ను కోపంగా ఏదో అనేసి వెళ్లాడతను.