IPL 2022 Auction: అప్పుడు బిడ్డింగ్‌ ఆగిపోవాలనుకున్నా: దీపక్‌ చాహర్‌

దిల్లీ: వేలంలో చెన్నై సూపర్‌ కింగ్స్‌ తనకు రూ.13 కోట్లు పెట్టినప్పుడు బిడ్డింగ్‌ ఆగిపోవాలని కోరుకున్నానని ఆ జట్టు పేసర్‌ దీపక్‌ చాహర్‌ అన్నాడు. ‘‘ఐపీఎల్‌ వేలంలో ఒక దశకు వచ్చిన తర్వాత బిడ్డింగ్‌ ఆగిపోవాలని కోరుకున్నా. అప్పటికే నా ధర రూ.13 కోట్లుగా ఉంది. ఈ స్థితిలో బిడ్డింగ్‌ ఆపేస్తే చెన్నై సొంతమయ్యే అవకాశం ఉంది. ఇలా జరిగితే మిగిలిన డబ్బులతో ఇంకా ఎక్కువమంది ఆటగాళ్లను కొనచ్చు. ఒక ఆటగాడిగా జట్టు బలంగా ఉండాలని కోరుకుంటా. చెన్నై తప్ప వేరే జట్టుకు ఆడడాన్ని ఊహించలేను. 2018లో తొలిసారి శ్రీనివాసన్‌ సార్‌ను కలిసినప్పుడు ‘నువ్వెప్పుడూ పసుపు జెర్సీలోనే ఆడతావు’ అన్నారు. ఆ మాటలని బట్టి చెన్నై నా కోసం తప్పకుండా బిడ్‌ వేస్తుందని ఊహించా’’ అని చాహర్‌ అన్నాడు. వేలంలో రికార్డు స్థాయిలో రూ.14 కోట్లు పెట్టి చెన్నై జట్టు దీపక్‌ను చేజిక్కించుకుంది. ఇంత భారీ ధరకు అమ్ముడుపోయిన తొలి భారత బౌలర్‌ అతడే. 2018లో రూ.80 లక్షలతో అతడిని తొలిసారి కొన్న దగ్గర నుంచి చెన్నైకు ప్రాతినిధ్యం వహించడం చాహర్‌కు ఇది అయిదోసారి.