Shreyas Iyer: కోల్‌కతా కెప్టెన్‌గా శ్రేయస్‌

కోల్‌కతా: టీమ్‌ఇండియా ఆటగాడు శ్రేయస్‌ అయ్యర్‌ ఐపీఎల్‌లో కోల్‌కతా నైట్‌రైడర్స్‌ కెప్టెన్‌గా నియమితుడయ్యాడు. ఇటీవలే ఆటగాళ్ల వేలంలో రూ.12.25 కోట్లకు అయ్యర్‌ను కొనుగోలు చేసిన కోల్‌కతా.. అతనికి సారథ్య బాధ్యతలు అప్పగించింది. 2020లో దిల్లీ క్యాపిటల్స్‌కు కెప్టెన్‌గా వ్యవహరించిన శ్రేయస్‌ ఆ జట్టును ఫైనల్‌కు చేర్చాడు. ఐపీఎల్‌లో దిల్లీకి అదే అత్యుత్తమ ప్రదర్శన. అనంతరం రిషబ్‌ పంత్‌కు సారథ్యం అప్పగించడంతో దిల్లీని వీడిన అయ్యర్‌ వేలంలోకి వచ్చాడు. భారీ మొత్తానికి అయ్యర్‌ను సొంతం చేసుకున్న కోల్‌కతా.. ఇయాన్‌ మోర్గాన్‌ స్థానంలో అతడిని సారథిగా నియమించింది. ‘‘కోల్‌కతా వంటి ప్రతిష్టాత్మక జట్టుకు నాయకత్వం వహించే అవకాశం లభించడం గౌరవంగా భావిస్తున్నా. భిన్న దేశాలు, సంస్కృతులకు చెందిన అత్యుత్తమ ఆటగాళ్లను ఐపీఎల్‌ ఒకచోటికి చేరుస్తుంది. ఈ ప్రతిభావంతుల బృందానికి సారథ్యం వహించేందుకు ఆసక్తిగా ఎదురుచూస్తున్నా’’ అని అయ్యర్‌ తెలిపాడు.