IPL 2022: ప్రత్యర్థులకు కోహ్లితో కష్టమే: మాక్స్‌వెల్‌

దిల్లీ: కెప్టెన్సీ భారం తొలగిపోవడంతో విరాట్‌ కోహ్లి ఒత్తిడి లేకుండా కనిపిస్తున్నాడని.. ఐపీఎల్‌లో ప్రత్యర్థులకు అతడి నుంచి ముప్పు ఉన్నట్లేనని రాయల్‌ ఛాలెంజర్స్‌ బెంగళూరు స్టార్‌ బ్యాటర్‌ గ్లెన్‌ మ్యాక్స్‌వెల్‌ అన్నాడు. ‘‘కెప్టెన్సీ భారం తొలగడంతో విరాట్‌ కోహ్లీపై ఒత్తిడి తగ్గిపోయింది. ఈసారి ఐపీఎల్‌లో ప్రత్యర్థులకు ఇది ప్రమాదకరమైన వార్తే. కెప్టెన్సీ లేకపోవడంతో అతడు మిగిలిన కెరీర్‌ను ఆస్వాదిస్తూ ఎలాంటి ఒత్తిడి లేకుండా ముందుకు సాగాలి. అతడికి ప్రత్యర్థిగా ఆడినప్పుడు కోహ్లి చాలా దూకుడుగా కనిపించేవాడు. మ్యాచ్‌లో ఎప్పుడూ లీనమై ఉండేవాడు. అయితే ఈ ఏడాది అతడి భావోద్వేగాలకు పరీక్షగా మారింది. విరాట్‌ ఎంతో ఆచితూచి నిర్ణయాలు తీసుకుంటాడు. కానీ కెప్టెన్సీ నుంచి తప్పుకోవడం నన్ను ఆశ్చర్యపరిచింది’’ అని మ్యాక్స్‌వెల్‌ చెప్పాడు.