Faf duplessis: కెప్టెన్‌గా డుప్లెసిస్‌ గొప్పగా రాణిస్తాడు

ముంబయి: బెంగళూరు కెప్టెన్‌గా డుప్లెసిస్‌ డ్రెస్సింగ్‌రూమ్‌లో అందరి గౌరవాన్ని పొందుతున్నాడని ఆ జట్టు ఆల్‌రౌండర్‌ గ్లెన్‌ మ్యాక్స్‌వెల్‌ చెప్పాడు. ‘‘కెప్టెన్‌గా డుప్లెసిస్‌ గొప్పగా రాణించబోతున్నాడని భావిస్తున్నాం. ఈ సీజన్‌ను ఆరంభించిన తీరు చూస్తేనే డ్రెస్సింగ్‌రూమ్‌లో అందరూ అతణ్ని ఎంతో గౌరవిస్తున్నారని అర్థం చేసుకోవచ్చు. డుప్లెసిస్‌ జట్టును ముందుండి నడిపిస్తున్నాడు’’ అని మ్యాక్స్‌వెల్‌ అన్నాడు. జట్టులో సీనియర్‌ ఆటగాళ్లంతా అతడికి సహకరించాలని, భారాన్ని పంచుకోవాలని అతను సూచించాడు. తాను ఎప్పుడెప్పుడు మైదానంలోకి దిగుదామా అన్న ఉత్సాహంతో ఉన్నట్లు మ్యాక్స్‌వెల్‌ తెలిపాడు. తన వివాహం కారణంగా మ్యాక్సీ బెంగళూరు తొలి రెండు మ్యాచ్‌ల్లో ఆడలేకపోయిన సంగతి తెలిసిందే. 9న ముంబయితో జరిగే మ్యాచ్‌కు అతడు అందుబాటులో ఉంటాడని భావిస్తున్నారు.