అలా ఎందుకంటారో చాహల్‌ చూపించాడు

ముంబయి: టీ20లో లెగ్‌ స్పిన్నర్లను మ్యాచ్‌ విన్నర్లుగా ఎందుకు పరిగణిస్తారో చాహల్‌ చూపించాడని రాజస్థాన్‌ బౌలింగ్‌ కోచ్‌ లసిత్‌ మలింగ అన్నాడు. సోమవారం కోల్‌కతాతో మ్యాచ్‌లో లెగ్‌ స్పిన్నర్‌ చాహల్‌ (5/40) హ్యాట్రిక్‌తో విజృంభించి రాజస్థాన్‌కు విజయాన్ని అందించాడు. ‘‘చాహల్‌కు ఎక్కువ అంతర్జాతీయ అనుభవం ఉంది. దేశంలో, టోర్నీలో అత్యంత అనుభవం కలిగిన లెగ్‌ స్పిన్నర్‌ అతనే. నైపుణ్యంపై పట్టు సాధించడమెలాగో చూపించాడు. భవిష్యత్తులో ఏ స్థాయి పోటీ క్రికెట్లోనైనా ఆడగలడనని నిరూపించుకోడానికి  అతనికి అదెంతో కీలకం. లెగ్‌ స్పిన్నర్లకు వికెట్లు తీసే అవకాశాలు ఎక్కువగా ఉంటాయి. వికెట్లు ఎలా తీయగలడో అతను చూపించాడు. ఒక్క ఓవర్లోనే మ్యాచ్‌ను మార్చేశాడు. టోర్నీలో లెగ్‌ స్పిన్నర్లను మ్యాచ్‌ విన్నర్లుగా ఎందుకు పరిగణిస్తారో చాహల్‌ చూపించాడు’’ అని మలింగ వివరించాడు.