Ravindra Jadeja: టీమ్‌ఇండియాకు జడేజా సారథ్యం వహించగలడు: రాయుడు

ముంబయి: ఏదో ఒకరోజు టీమ్‌ఇండియాకు సారథ్యం వహించే సామర్థ్యం రవీంద్ర జడేజాలో ఉందని చెన్నై బ్యాటర్‌ అంబటి రాయుడు అన్నాడు. దిగ్గజ ఆటగాడు మహేంద్రసింగ్‌ ధోని స్థానాన్ని భర్తీ చేయడం అసాధ్యమని రాయుడు తెలిపాడు. ‘‘ధోని స్థానాన్ని భర్తీ చేయడం ఎప్పటికీ జరగని పని. కానీ జడేజా సమర్థుడు. ధోని  మార్గనిర్దేశనం.. అతను మైదానంలో ఉన్నంత వరకు జడేజాకు సారథ్యం సులువే. అతను మరింత మెరుగవుతాడు కూడా. చెన్నై ఒక్కటే కాదు ఏదో ఒకరోజు టీమ్‌ఇండియాకు సారథ్యం వహించగల సామర్థ్యం జడేజాలో ఉంది. చెన్నై జట్టు సంధి దశలో ఉంది. రానున్న కాలంలో చాలామంది యువ ఆటగాళ్లు చెన్నై జట్టులో కొనసాగుతారు. జడేజా వంటి యువ సారథిని కలిగి ఉండటం.. అతని ఆటతీరును చూడటం వారికి సానుకూలాంశమే. వాళ్లకు కెప్టెన్‌ మద్దతు ఉంటుంది. జట్టు కోణంలో చూస్తే జడేజా సరైన దిశలో ప్రయాణిస్తున్నాడు. అతని ఆధ్వర్యంలో చెన్నై చాలా చాలా విజయవంతమవుతుంది’’ అని రాయుడు వివరించాడు.