సింధు, శ్రీకాంత్‌ శుభారంభం

సైనా, ప్రణయ్‌ ఔట్‌
థాయ్‌లాండ్‌ ఓపెన్‌ బ్యాడ్మింటన్‌

బ్యాంకాక్‌: థాయ్‌లాండ్‌ ఓపెన్‌ ప్రపంచ టూర్‌ సూపర్‌ 500 బ్యాడ్మింటన్‌ టోర్నీలో భారత అగ్రశ్రేణి క్రీడాకారులు పి.వి.సింధు, కిదాంబి శ్రీకాంత్‌ శుభారంభం చేశారు. మహిళల సింగిల్స్‌ తొలి రౌండ్లో ఆరో సీడ్‌ సింధు 21-19, 19-21, 21-18తో లారెన్‌ లామ్‌ (అమెరికా)పై, మాళవిక బాన్సోద్‌ 17-21, 21-15, 21-11తో మరియా యులిటినా (ఉక్రెయిన్‌)పై గెలిచి ప్రిక్వార్టర్స్‌ చేరుకున్నారు. సైనా నెహ్వాల్‌ 21-11, 15-21, 17-21తో కిమ్‌ యున్‌ (కొరియా) చేతిలో ఓడి టోర్నీ నుంచి నిష్క్రమించింది. ఆకర్షి కశ్యప్‌ 13-21, 18-21తో మిచెల్‌ లీ (కెనడా) చేతిలో, అష్మిత చాలిహ 10-21, 15-21తో ఇంతానన్‌ రచనోక్‌ (థాయ్‌లాండ్‌) చేతిలో ఓడారు. థామస్‌ కప్‌ విజయంతో జోరుమీదున్న శ్రీకాంత్‌ ప్రిక్వార్టర్స్‌లో అడుగుపెట్టాడు. పురుషుల సింగిల్స్‌ తొలి రౌండ్లో శ్రీకాంత్‌ 18-21, 21-10, 21-16తో బ్రైస్‌ లెవెర్‌దెజ్‌ (ఫ్రాన్స్‌)పై గెలుపొందాడు. హెచ్‌.ఎస్‌.ప్రణయ్‌ 17-21, 21-15, 15-21తో డారెన్‌ ల్యూ (మలేసియా) చేతిలో పరాజయం పాలయ్యాయడు. సాయి ప్రణీత్‌ 12-21, 13-21తో కాంటాఫాన్‌ (థాయ్‌లాండ్‌) చేతిలో, సౌరభ్‌వర్మ 20-22, 12-21తో టోమా జూనియర్‌ పొపోవ్‌ (ఫ్రాన్స్‌) చేతిలో పరాజయం చవిచూశారు. మహిళల డబుల్స్‌ తొలి రౌండ్లో అశ్విని భట్‌- శిఖ గౌతమ్‌ జోడీ 21-12, 21-17తో కిటిపక్‌- పతనవరితిపన్‌ (థాయ్‌లాండ్‌) జంటపై విజయం సాధించింది. మిక్స్‌డ్‌ డబుల్స్‌ తొలి రౌండ్లో ఇషాన్‌ భట్నాగర్‌- తనిషా క్రాస్టో జోడీకి వాకోవర్‌ లభించింది. సుమీత్‌రెడ్డి- అశ్విని పొన్నప్ప 17-21, 17-21తో యుకి- మిసాకి (జపాన్‌) చేతిలో, రాజు మహ్మద్‌ రెహాన్‌- జమాలుదీన్‌ అనీస్‌ 12-21, 13-21తో యమషిత- షినోయా (జపాన్‌) చేతిలో, వెంకట గౌరవ్‌ ప్రసాద్‌- జుహి 15-21, 11-21తో జోసియానో- హెదియానా (ఇండోనేసియా) చేతిలో ఓడారు. పురుషుల డబుల్స్‌ తొలి రౌండ్లో కృష్ణ ప్రసాద్‌- విష్ణువర్ధన్‌గౌడ్‌ 21-23, 11-21తో వీ కెంగ్‌- వాంగ్‌ చాంగ్‌ (చైనా) చేతిలో ఓటమి చవిచూశారు.