ఆర్చరీలో మరో కాంస్యం

గ్వాంగ్జు: ప్రపంచకప్‌ స్టేజ్‌- 2 ఆర్చరీ టోర్నీలో భారత్‌ ఖాతాలో మరో కాంస్యం చేరింది. రికర్వ్‌ మహిళల టీమ్‌ విభాగంలో రిధి, కోమలిక, అంకిత త్రయం మూడో స్థానంలో నిలిచింది. గురువారం కంచు పతక పోరులో భారత్‌ 6-2 (56-52, 54-51, 54-55, 55-54) తేడాతో చైనీస్‌ తైపీపై విజయం సాధించింది. నిలకడైన ప్రదర్శనతో సత్తాచాటిన అమ్మాయిలు ఆరంభంలోనే 4-0తో ఆధిక్యంలోకి దూసుకెళ్లి పతకాన్ని ఖాయం చేశారు. తొలి 12 బాణాలకు గాను మూడు సార్లు 10, ఎనిమిది సార్లు తొమ్మిది చొప్పున పాయింట్లు సాధించారు. ఆ తర్వాత కాస్త తడబడ్డా ఏ మాత్రం ఇబ్బంది లేకుండా పోయింది. అంతకుముందు సెమీస్‌లో భారత్‌   2-6 (53-55, 57-55, 51-53, 43-53)తో  కొరియా చేతిలో పరాజయం పాలైంది.